Har bir fuqaroning qadr qimmatini eʼzozlash, adolatli jamiyatning ajralmas xususiyatidir

Men, “Adolat” SDP xayrixohi sifatida partiyaning siyosiy jarayonlardagi faoliyatini muntazam kuzatib boraman. Mana shu kecha kunduzda mamlakatimiz siyosiy hayotida oʻta muhim kompaniya Oʻzbekiston Respublikasi Prezidentini saylash jarayonlarida ham partiya siyosiy kuch sifatida munosib nomzodi bilan maydonga chiqdi. Men bir sudya sifatida “Adolat” SDP dan Oʻzbekiston Respublikasi Prezidentligiga nomzod Robaxon Maxmudovaning saylovoldi dasturini oʻqib chiqdim. Dasturda ijtimoiy-siyosiy hayotimizning barcha jabhalari qamrab olingan. Ayniqsa menga huquqiy davlat qurish, qonun ustuvorligiga asoslangan adolatli jamiyat barpo etish borasida nomzod tomonidan ilgari surilgan gʻoyalar juda maʼqul boʻldi.

Prezidentlikka nomzodning saylovoldi dasturida sudyalar faoliyati toʻgʻrisida ham bu masala alohida eʼtirof etilgan. Inson huquq va erkinliklarini ishonchli himoya qilish uchun, eng avvalo sudlar mustaqilligini taʼminlash maqsadida sudyalarning xalq deputatlari Kengashlariga axborot berish amaliyotini bekor qilish ilgari surilgan. Umuman olganda, sudlar adolat qoʻrgʻoni boʻlishi tarafdori ekanligi haqidagi fikr juda dolzarbdir. Bundan tashqari, sudyalar sonini koʻpaytirish, ularning ixtisoslashuvini taʼminlash, jumladan, oilaviy, mehnat, intellektual mulk, voyaga yetmaganlar huquqlarini himoya qilishga oid nizolar boʻyicha ixtisoslashtirilgan sudyalar korpusini shakllantirish masalalari diqqat markazimizda boʻladi. Qonun asosida yashash hayot tarzimizga aylanishi lozim. Buning uchun, eng avvalo, Konstitutsiya va qonunlarning ustunligini taʼminlashimiz shart.

Birinchi navbatda sud va huquqni muhofaza qiluvchi organlarning ish uslubini oʻzgartirish, ular faoliyatida amal qilib kelayotgan ayrim eskicha yondashuvlarni bartaraf qilish, yaʼni jazolash gʻoyasidan adolat, tenglik, erkinlik gʻoyalariga oʻtish zarur .

Fuqarolarning huquqlarini taʼminlash va munosib himoya qilishda advokatlarning oʻrni va roli beqiyos. Shu bois odil sudlovni taʼminlashda advokatga berilgan huquqlarni qayta koʻrib chiqish zarur ekanligini hayotning oʻzi tasdiqlamoqda.

Dasturda “Qonun ustuvorligi — adolatli jamiyat qurishning muhim sharti!” degan tamoyilni jamiyatning har bir aʼzosi, ayniqsa, mansabdor shaxslar faoliyatining muhim qoidasiga aylantirishga ham alohida eʼtibor qaratilgan.

“Adolat” SDP uchun oliy qadriyat bu – inson, uning huquq va erkinliklaridir!

Jumladan nomzod dasturida davlat xizmatiga ishga kiradigan har bir xodimni Konstitutsiyani bilish boʻyicha sinovdan oʻtkazish lozim, deb hisoblaydi. Huquqbuzarlikka guvoh boʻlgan odamni sud va tergov organlariga ovora qilib chaqiravermasdan, zamonaviy raqamli texnologiyalardan keng foydalanish va ularni ragʻbatlantirish kabi usullardan foydalanishni ilgari surgan.

Shuningdek dasturda sudyaning sud jarayonidagi faol rolini bosqichma-bosqich kamaytirib borib, asosan tomonlar oʻrtasidagi keltiriladigan dalillarni baholashga koʻproq urgʻu berish kerak. Shu bilan birga advokatura faoliyatiga zamonaviy axborot-kommunikatsiya texnologiyalarini yanada kengroq joriy etish yoʻlidan borib, ayniqsa, advokatura, sud va huquqni muhofaza qiluvchi organlar hamda boshqa davlat organlari oʻrtasida elektron maʼlumot almashinuvini yanada yaxshilash choralarini koʻrish kabi dolzarb takliflarni ilgari surgan.

Men nomzod dasturida mamlakatimiz istiqbolini taʼminlashga arziydigan juda koʻp ustuvor yoʻnalishlar belgilanganini guvohi boʻldim. Ayniqsa biz sudyalar faoliyatimizda duch kelayotgan muammo va kamchiliklarni bartaraf etishga xizmat qiladigan gʻoyalar ilgari surilayotganidan quvondim. Biz sudyalar 9-iyul kuni boʻlib oʻtadigan saylovda faol qatnashib munosib nomzodga ovoz beramiz.

                                                     Raupov Muzaffar Pulatovich, 

                                                 Qashqadaryo viloyat sudining fuqarolik

                                                 ishlari buyicha sudyasi.