Har jabhada faol boshlangʻich partiya tashkiloti

Maʼlumki, partiyaning xalq orasidagi obroʻ –eʼtibori uning tarkibiga birlashgan faol aʼzolari soniga hamda boshlangʻich partiya tashkilotlariga   bogʻliq. Shu bois ham partiyamiz safini faol aʼzolar, BPTlar soni hisobiga oshirib borish asosiy maqsadlarimizdan birisanaladi. Ushbu masalaga ustuvor vazifa sifatida qarab kelayotgan Respublika ixtisoslashtirilgan onkologiya va radiologiya ilmiy-amaliy tibbiyot markazi Xorazm filialidagi boshlangʻich partiya tashkiloti yana 60 nafar aʼzoni oʻz atrofiga birlashtirdi.

Oʻz atrofida 267 nafar aʼzoni birlashtirgan boshlangʻich partiya tashkilotimiz partiyaning dastur va maqsadlarini hayotga tatbiq etishda faol ishtirok etmoqda, –deydi BPT raisi Otaxon Tadjiddinov. – Partiya tomonidan tashkil etilayotgan nufuzli maʼnaviy, maʼrifiy, siyosiy tadbirlarning yuqori darajada tashkil etilishida aʼzolarimizning hissasi munosibdir. Safimizga yana oltmish nafar faol aʼzoning qoʻshilishi safimizning kengayishi bilan birga   faoliyatimizni yanada izchillik bilan olib borishga imkoniyat yaratadi.

Boshlangʻich partiya tashkiloti tomonidan partiyaning 10 dan ziyod loyihalari doirasida amalga oshirilayotgan ishlari bilan xalqimiz orasida munosib oʻrin tutmoqda.   “Salomatlik yoʻlida birlashaylik!” , “Tozalik yoʻlida birlashaylik!” , “Bir adolatchi yuz ayolga himoyachi!” kabi koʻplab loyihalar doirasida olib borilayotgan ishlarni qayd etish joizdir.

BPTning bir guruh tajribali onkolog aʼzolari bilan hamjihatlikda     viloyatimizning   chekka — chekka qishloqlarida istiqomat qilayotgan “Temir daftar”, “Ayollar daftari” roʻyxatida turgan kam taʼminlangan, boquvchisini yoʻqotgan onkologik kasalligiga chalingan ayollarni joyning oʻziga borib, bepul jarrohlik amaliyotini oʻtkazishi natijasida 10 nafardan ziyod ayollar sogʻlom hayotga qaytarildi.

 Urganch shahar aholisi uchun BPT tomonidan   tibbiy koʻriklar tashkil etilmoqda, –deydi partiyaning Urganch shahar Kengashi raisi Rustam Boltayev. – Viloyat Qon quyish markazida har yili 1- iyul “Xalqaro bolalar kuni”, 3-dekabr “Nogironlar kuni” munosabati bilan tashkil etib kelinayotgan   “Bor mehrimiz senga, bolajon!”   shiori doirasidagi begʻaraz donorlik aksiyasida ham safdoshlarimiz faollik koʻrsatib kelmoqda. Viloyat miqyosidagi keng koʻlamli tadbirlarda BPTning imkoniyatlaridan samarali foydalanamiz. Ular doim Kengashimiz bilan hamkorlikda partiyaning dasturiy-gʻoyalarini amalga oshirishda jonbozlik koʻrsatishmoqda.

Yoshlar va ishsiz fuqarolarning bandligini taʼminlash ham BPTning doim diqqat markazida hisoblanadi. Joriy yilda BPTning saʼy harakatlari bilan 11 nafar ishsiz fuqaro ish bilan taʼminlandi.

Shuningdek, joriy yilning 30-aprel kuni boʻlib oʻtgan Refirendum, 9 –iyul kuni boʻlib oʻtgan Oʻzbekiston Respublikasi Prezident saylovini munosib oʻtkazishda bor imkoniyatini safarbar etishdi.

BPT aʼzolari, Davlatimiz rahbari tomonidan qabul qilingan qaror va farmonlar, mamlakatimizda olib borilayotgan islohotlarga befarq emasligi, ularning ommaviy axborot vositalari hamda internet ijtimoiy tarmoqlari orqali bildirayotgan munosabatlarida oʻz ifodasini topmoqda.

Bir soʻz bilan aytganda, har jabhada faol partiyadoshlarimiz birikkan mazkur boshlangʻich partiya tashkiloti tomonidan amalga oshirilayotgan bu kabi tashabbuslar partiyamiz rivoji yoʻlida munosib oʻrin egallaydi.

                                                                                            Zamira Abdullaeva,

          “Adolat” SDP Xorazm viloyat Kengashi matbuot kotibi.