Ikki nafar xotin-qiz uyli bo‘ldi, 80 nafar fuqaroning bandligi taʼminlandi

Deputat saylovchi ko‘ngliga yo‘l topib, ularni bunyodkorlikka, yaratuvchilikka, ezgulikka, yaxshilikka daʼvat qiladi va o‘zi ham odamlar yuragidan joy oladi. Xalq deputatlari Ko‘kdala tuman Kengashidagi O‘zbekiston “Adolat” SDP deputatlik guruhi aʼzolari ham doimiy ravishda fuqarolar manfaatini himoya qilib kelishayapti. 

Garchi tuman tashkil etilganiga hali ko‘p vaqt o‘tmagan bo‘lsa-da, deputatlik guruhi aʼzolari salmoqli ishlarni amalga oshirishga ulgurishdi. Bunda, ayniqsa, Prezidentimiz tashab­busi bilan yo‘lga qo‘yilgan xalq bilan muloqot tizimi yaxshi samara berayapti. Deputatlar saylovchilar bilan uchrashuvlarda mamlakatimizda keng miqyosda kechayotgan islohotlar mohiyati, Yangi O‘zbekistonning ichki va tashqi siyosati, davlatimiz rahbari saʼy-harakati bilan barcha jabhada amalga oshirilayotgan buyuk o‘zgarish­lar haqida tushuncha berayaptilar. 

Darvoqe, Ko‘kdala tumani Prezidentimiz qarori bilan 2022 yil 19 aprel kuni tashkil topgan. Yer maydoni 171 ming gektarni tashkil etadi. Shundan 10 ming gektar lalmi va adir yerlarda tomchilatib sug‘orish texnologiyasi asosida bog‘, tokzorlar barpo etilayapti. Tumanda 32 ta mahallada 182 mingdan ortiq aholi yashaydi. Ko‘kdalada bugungi kunda 162 ta sanoat korxonasi, 1 ta kichik sanoat zonasi mavjud. 

Prezidentimiz shu yil 21 aprel kuni tumanga tashrifi chog‘ida Yettitom shaharchasi infratuzilmasini rivoj­lantirish, bu yerda mahalliy idoralar uchun binolar, “Yangi O‘zbekiston” massivi, bog‘cha va maktablar, polik­linika, istirohat bog‘i, xalqaro ahamiyatdagi yo‘l bo‘yida xizmat ko‘rsatish va savdo majmualari barpo etish, 159 kilometr yo‘lni taʼmirlash, 50 kilometr ichimlik suv, 80 kilometr elektr tarmoqlari tortish yuzasidan topshiriqlar bergan edi. Shuningdek, davlatimiz rahbari yangi binolarni energiya tejamkor qilib qurish, ularga quyosh energiyasi panellari o‘rnatish muhimligini qayd etdi. Shu bilan birgalikda Ko‘kdalada 500-1000 megavatlik quyosh elektr stansiyalari va quyosh panellari korxonasini barpo etish zarurligini taʼkidladi. 

Ayni paytda aholiga munosib turmush sharoitini yaratish, hududni iqtisodiy rivojlantirish, aholi bandligini taʼminlash, mahallalarda odamlarni qiynab kelayotgan muammolarni bartaraf etishda xalq deputatlari tuman Kengashidagi “Adolat” SDP deputatlik guruhi aʼzolari ham faol ish olib borayaptilar. Ayniqsa, bu borada guruh aʼzosi Ilhom Yunusovning odamlar muammo-tashvish­larini tinglab, masalaga o‘z vaqtida yechim topayotgani eʼtiborga molik. 

Ilhom Yunusov joriy yilning 10 may kuni “Soybo‘yi” mahallasi aholisi bilan uchrashganida fuqarolar ichki yo‘llar nosozligidan shikoyat qilishgan edi. Shundan so‘ng deputat tuman hokimining qurilish bo‘yicha o‘rinbosari va masʼul idoralarga deputatlik so‘rovi yubordi. Deputat tashabbusi bilan hozirgacha 19 kilometr ichki tuproq yo‘llarga shag‘al to‘kildi. Ilhom Yunusov saʼy-harakati bilan uy-joysiz qiynalib kelayotgan Shohida Ishma­matova va Dilnoza Ermatovaga mahallaning eski binosi homiylarni jalb etgan holda taʼmirlanib, uy-joy sifatida topshirildi. 

– Bunday g‘amxo‘rlik va eʼtibordan ko‘nglim tog‘dek ko‘tarildi, – dey­di Dilnoza Ermatova. – Ilhom Yunusovdek fidoiy deputatlar ko‘paysin. Xalqimiz orasidan mehr-oqibat ko‘tarilmasin. 

Deputatning xayrli va savob ishlari tufayli o‘tgan uch oy ichida kasalmand bo‘lib qolgan 8 fuqaroga tuman tibbiyot birlashmasiga qarashli shifoxonalarda davolanishga ko‘mak­lashildi. Uch nafar nochor bemorning “Saxovat va ko‘mak” jamg‘armasidan moddiy yordam olishi taʼminlandi. 

Sug‘diyona Qambarova “Soybo‘yi” MFYdagi kam taʼminlangan oilada istiqomat qiladi. U joriy yil Samarqand tibbiyot kollejiga kontrakt to‘lov asosida o‘qishga qabul qilindi. Kontrakt pulini to‘lashga esa kam taʼminlangan oilaning qurbi yetmaydi. Shundan so‘ng fuqaro amaliy yordam so‘rab deputat Ilhom Yunusovga murojaat qildi. Deputat uning arizasini o‘rganib, homiylar bilan hamkorlikda kontrakt puli to‘lab berilishiga erishdi. Shuningdek, yordam so‘rab murojaat qilgan to‘qqiz nafar yoshlarga dehqonchilik bilan shug‘ullanishlari hamda ichimlik suvi zarurati tufayli artezian quduqlar qazish uchun imtiyozli kreditlar ajratilishiga yordam berdi. Bundan tashqari, u ishsiz Mehriniso Sayilovaga besh quti asal­arini imtiyozli kredit asosida olib berdi. 

Deputat mahalladagi “Temir daftar”, “Ayollar daftari”ga kiritilgan besh fuqaroga subsidiya olishlariga amaliy yordam bergan edi. Ayni payt­da ular bir sotixlik yerga issiqxona qurib, qishloq xo‘jaligi mahsulotlari yetishtirmoqdalar va xalqimiz dasturxoni to‘kin bo‘lishiga hissa qo‘shmoqdalar. 

Deputat ko‘magi bilan amaldagi yilning iyul-avgust oylarida “Soybo‘yi ko‘rki”, “Zilolaxon ezgulik nuri”, “Eshonqulova Raʼno Xushmurodovna”, “Hazratqulova Rohat Eshdavlatovna” kabi yakka tartibdagi tadbirkorlik subyektlari tashkil etilgan edi. Ayni paytda ular turli yo‘nalishlarda aholiga namunali xizmat ko‘rsatish bilan birga 6 nafar ishsiz fuqaroni ish bilan taʼminlashga erishdilar. 

Deputatning bevosita saʼy-harakati va ko‘magi bilan uch oy ichida 80 nafar fuqaro o‘zini o‘zi band qilishga muvaffaq bo‘ldi. 

Deputatlik guruhi aʼzosi Venera Husainova ham mahallalarga tez-tez yuzma-yuz muloqotlar uyushtirib, fuqarolarning mushkulini hal etishga harakat qilmoqda. Mamlakatimiz mustaqilligining 32 yilligi keng nishonlanayotgan ushbu kunlarda u o‘ndan ortiq kam taʼminlangan, muhtoj oilalar holidan xabar oldi.

  Nogiron Nasiba Mirzayeva “Oltin dala” MFYda yolg‘iz yashaydi. O‘zgalar parvarishiga muhtoj. Deputat Venera Husainova u yashayotgan xonadonda bo‘lib, moddiy yordam ko‘rsatdi. Homiylar ishtirokida uy-joylari tartibga keltirildi. Kuz-qish mavsumi oldidan uy taʼmirlab berildi. 

Deputat xalq ishonchini qozonishi kerak. Prezidentimiz alohida taʼkid­laganlaridek, har bir rahbar, deputat, davlat xizmatchisi xalqqa ko‘proq yaqinlashsa, aholining dardini ting­lab, muammolarini hal etsa, odamlar hayotdan rozi bo‘ladi. Xalq deputatlari Ko‘kdala tuman kengashidagi “Adolat” SDP deputatlik guruhi aʼzolari ham odamlar orasida bo‘lib, saylovchilar ishonchini oqlashga astoydil harakat qilayaptilar. 

Komil Saxatov,

Doston Nusurov,

“Adolat” SDP Qashqadaryo viloyat kengashi masʼul xodimlari