Ilmli yoshlar – ertangi yurt kelajagi

Oʻzbekiston “Adolat” SDP Qoraqalpogʻiston Respublikasi va Nukus shahar Kengashi faollari, “Yosh adolatchilar qanoti” aʼzolari tomonidan Qoraqalpoq davlat universiteti yuridik fakulteti talaba yoshlari oʻrtasida “Adolatli jamiyat uchun ovoz beramiz” shiori ostida targʻibot tadbiri oʻtkazildi.

Tadbir avvalida Oʻzbekiston “Adolat” SDP Qoraqalpogʻiston Respublikasi Kengashi raisi Nurlibay Qaypbergenov soʻzga chiqib, Yangilanayotgan Konstitutsiyamiz va undan joy olgan inson qadr-qimmati, manfaati, yoshlar kelajagi bilan bogʻliq ahamiyatli moddalarning mazmun-mohiyati toʻgʻrisida maʼlumotlar berdi.

Taʼkidlash joizki, Yangilanayotgan Konstitutsiyada yoshlarga oid qator normalar oʻz ifodasini topmoqda. Alohida bir bobning oila, bolalar va yoshlar masalasiga bagʻishlangani ham yurtimizda yoshlar huquqlarini himoya qilishga qanchalik eʼtibor qaratilayotganini koʻrsatadi.

Oʻtkazilgan tadbir davomida ushbu taʼlim muassasasidagi yoshlarga partiyaning targʻibot vositalari tarqatilib, 30-aprel kuni oʻtkaziladigan referendumda barchani faol ishtirok etishga chaqirildi.

Oʻzbekiston “Adolat” SDP
Qoraqalpogʻiston Respublikasi
Kengashi matbuot xizmati