Imzo yigʻish jarayonida fuqarolarimiz faollik koʻrsatishmoqda

Maʼlumki, joriy yilda mamlakatimizda muhim siyosiy jarayon — Prezident saylovi boʻlib oʻtadi. Mazkur saylovdagi muhim jarayonlardan biri saylov kampaniyasi davrida — siyosiy partiyaning oʻz nomzodi roʻyxatga olinishi uchun saylovchilar imzosini toʻplash hamda ularning haqqoniyligini tekshirish hisoblanadi.

Belgilangan namunadagi imzo varaqalarining blankalari saylov kampaniyasi boshlanganligi eʼlon qilingandan keyin Markaziy saylov komissiyasi tomonidan beriladi.

Saylovchilarning imzosini toʻplash ish, xizmat, oʻqish, yashash joyida, saylovoldi tadbirlarida, shuningdek, targʻibot- tashviqotni amalga oshirish va imzo toʻplash qonun bilan taqiqlanmagan boshqa joylarda amalga oshiriladi. Imzo toʻplayotgan shaxs tomonidan saylovchilarni majburlash va oʻziga ogʻdirib olishning har qanday shakli qonunda belgilangan tartibda javobgarlikka sabab boʻladi.

Siyosiy partiyaning saylovda ishtirok etishini qoʻllab-quvvatlash bu saylovchining ixtiyoriy xohishi. Saylovchi siyosiy partiyaning dasturi va amaliy faoliyati bilan tanish boʻlsa hamda mazkur siyosiy partiyaning saylovlar jarayonida ishtirok etishini qoʻllab-quvvatlasa, demak, ular toʻplagan imzo varagʻiga oʻz imzosini qoʻyadi. Lekin bu saylovchi aynan shu siyosiy partiyaning nomzodini qoʻllab-quvvatlab ovoz beradi degani emas.

Shulardan kelib chiqqan holda, “Adolat” sotsial-demokratik partiyasining barcha hududiy tashkilotlari qatori Jizzax viloyati Kengashi ham imzo toʻplash jarayonida faollik koʻrsatib, hududlar kesimida imzo yigʻish ishlarini amalga oshirmoqda. Partiyaning Jizzax viloyati, tuman va shahar Kengashlari tomonidan bu boradagi ishlar jadallik bilan olib borilmoqda.

Jumladan, partiyaning viloyat Kengashi tomonidan tashkilotlarga kirgan holda mazkur siyosiy jarayonga befarq boʻlmagan, oʻz siyosiy pozitsiyasini ega fuqarolardan imzo yigʻilmoqda.

Imzo yigʻish davomida partiya faollari tomonidan fuqarolarga siyosiy jarayonlarda partiya tomonidan amalga oshirilayotgan ishlar, bu jarayonning mazmun-mohiyati, saylovda faol ishtirok etish hamda nomzodni qoʻllab-quvvatlashga doir imzo varaqasini toʻldirish talablari va maqsadi toʻgʻrisida atroflicha maʼlumotlar berib borilmoqda.

Orif Shukurov, “Adolat” SDP Jizzax viloyat Kengashi raisi

– Ushbu jarayonni belgilangan vaqtda, bexato tarzda oʻtkazish nafaqat viloyat, shahar yoki tuman partiya tashkiloti vakillari, balki har bir boshlangʻich partiya tashkiloti raislari va aʼzolarining ham oldida turgan muhim va masʼuliyatli vazifalardan biri hisoblanadi. Shuni toʻliq anglagan holda bugungi kunda boshlangʻich partiya tashkilotlari kesimida yetarlicha imzolarni toʻplashga harakat qilinmoqda. Hali imzo toʻplash jarayonlari davom etmoqda.

Joylardagi boshlangʻich partiya tashkilotlari raislari, mahalliy Kengash deputatlari, partiyaning “Ayollar qanoti” va “Yoshlar qanoti” faol   aʼzolarining yordami bilan bu jarayon qamrovi kun sayin ortib bormoqda. Partiyamizning har bir aʼzosi saylovchi sifatida oʻz imzolarini qoʻyishmoqda va bu orqali Prezidentlikka koʻrsatilgan nomzodni qoʻllab-quvvatlashda oʻzlarining munosib hissalarini qoʻshishmoqda.

Taʼkidlash lozimki, oʻz taqdirini yurt taqdiri bilan daxldor deb his qilgan har bir fuqaro ushbu siyosiy jarayonlarda faol ishtirok etishi, davlat boshqaruvida munosib nomzodni saylashda oʻz hissasini qoʻshishi muhim ahamiyatga egadir. Oʻylaymizki, oʻz yurti va unda yuz berayotgan ijtimoiy-siyosiy voqealarga befarq boʻlmagan har bir fuqarolarimiz saylovlarda masʼuliyat bilan ishtirok etadi.

 “Adolat” SDP  Jizzax viloyat Kengashi Мatbuot xizmati.