Imzo yigʻish jarayonlari uyushqoqlik bilan davom etmoqda

Bugungi kunda mamlakatimiz hayotida muhim siyosiy jarayon Oʻzbekiston Respublikasi Prezidentligiga saylovlarga tayyorgarlik ishlari qizgʻin davom etmoqda. Saylov kampaniyasining muhim qismi boʻlgan imzo toʻplash jarayonlari har bir siyosiy partiyaning viloyat, tuman, shahar Kengashlari hamda barcha quyi boʻgʻinlarida uyushqoqlik bilan amalga oshirilmoqda. Bu borada Oʻzbekiston “Adolat” SDP Jizzax viloyat Kengashi tomonidan ham joylarda partiya tomonidan Prezidentlikka koʻrsatilgan nomzodni qoʻllab-quvvatlovchi imzolarni yigʻish boʻyicha targʻibot-tashviqot tadbirlari oʻtkazilib kelinmoqda. Shunday tadbirlardan biri joriy yilning 19-may kuni Jizzax shahridagi “Oʻrda” ekologik bogʻida boʻlib oʻtdi.

Ushbu tadbirda oʻz fuqarolik pozitsiyasini namoyon etadigan, mamlakatimizda amalga oshirilayotgan keng qamrovli islohotlarga daxldorlik hissi bilan yondashadigan turli qatlam vakillari ishtirok etishdi. Tadbirda fuqarolarga boʻlajak saylovlarga tayyorgarlik, siyosiy partiyalar tomonidan koʻrsatilgan nomzodlar, saylov kampaniyasining muhim tarkibiy qismi boʻlgan imzo toʻplash jarayonlari, shu jumladan, “Adolat” SDP tomonidan Prezidentlikka koʻrsatilgan nomzod yuzasidan tushuntirishlar berildi.

– Boʻlib oʻtadigan Prezidentlik saylovida siyosiy partiyalardan koʻrsatilgan nomzodlar boʻyicha maʼlumotlar bilan tanishib chiqdim, qolaversa ushbu nomzodlarning aksariyati imzo yigʻish jarayonlarida qatnashdim va 9-iyulda boʻlib oʻtadigan siyosiy jarayonda oʻzim munosib koʻrgan nomzodga ovoz beraman. – deydi mehnat faxriysi Haydar Abdushukurov.  

Imzo toʻplash tadbirida birinchi marotaba saylovda ishtirok etuvchi yoshlar, partiya faollari, xotin-qizlar saylov kampaniyasining muhim bosqichida oʻzlarining faol fuqarolik pozitsiyalarini namoyish etdilar. Imzo toʻplash jarayonlari Jizzax viloyatining barcha hududlarida davom etmoqda.

“Adolat” SDP Jizzax viloyat Kengashi

Matbuot xizmati.