Inson huquqlarining ishonchli himoyasini taʼminlash davr talabidir

“Adolat” SDP Yakkabogʻ tuman Kengashi va huquq tartibot idoralari hamkorligida Qatagʻon MFY tadbirgohida “Qonun ustuvorligi – taraqqiyot garovi” mavzusida davra suhbati boʻlib oʻtdi. Unda partiya faollari, deputatlar, huquq tartibot idoralari vakillari hamda keng jamoatchilik ishtiroki taʼminlandi. Tadbirda huquqshunos, Oʻzbekiston “Adolat” SDP faoli Abdurahmat Kengboyev maʼruza qildi.

 — Davlatimiz rahbarining “Konstitutsiya va qonun ustuvorligini taʼminlash, bu borada jamoatchilik nazoratini kuchaytirish hamda jamiyatda huquqiy madaniyatni yuksaltirish boʻyicha qoʻshimcha chora-tadbirlar toʻgʻrisida”gi qaroriga muvofiq joylarda anchagina ishlar amalga oshirildi,- dedi Abdurahmat Kengboyev.- Aholining huquqiy ongini yuksaltirish borasida amalga oshirilayotgan ishlar Konstitutsiya va qonun ustuvorligini taʼminlash, bu borada jamoatchilik nazoratini kuchaytirish hamda jamiyatda huquqiy madaniyatni yuksaltirish boʻyicha chora-tadbirlar dasturiga asosan birgina shu yilning oʻzida partiya tashkilotlari tomonidan aholining huquqiy savodxonligini oshirish maqsadida 60 da ziyod targʻibot tadbirlari oʻtkazildi. Milliy taraqqiyotimizning oʻtgan yillari qizgʻin islohotlar davri boʻldi. Prezidentimiz rahbarligida ulkan tarixiy oʻzgarishlarga asos solindi. Yangi rivojlangan Oʻzbekistonni qurish, xalqimizning koʻp yillik asriy orzularini roʻyobga chiqarish, inson huquqlarini eng oliy qadriyat darajasiga koʻtarish, mavjud muammolarga yechim topish yoʻlida ulugʻ maqsadlarimizga erisha boshladik. Hali bu borada qiladigan ishlarimiz ham koʻp.

 — Shu kunlarda Prezidentimiz tashabbusi bilan yoʻlga qoʻyilgan odamlar bilan yuzma-yuz muloqot tizimi ham juda yaxshi samara bera boshladi,- dedi xalq deputatlari tuman Kengashi deputati Dilbar Musayeva.- Bunda ayniqsa adolatsizlikka uchragan fuqarolar xalq qabulxonalari orqali murojaat qilib oʻz xaq-huquqlarini tiklab olmoqdalar. Ayniqsa biz deputatlarning fuqarolar bilan ochiq muloqotlarimizda aholi tomonidan aytilayotgan muammolar soʻrovlarimiz asosida tegishli davlat idoralari tomonidan oʻz vaqtida ijobiy hal etilayotgani xalqimizning davlatga boʻlgan ishonchini yanada oshirmoqda. Birgina shu yilning oʻzida deputatlik guruhimizga murojaat qilgan 42 nafar fuqaroning muammolari deputatlarimiz tomonidan ijobiy hal etildi.

Tadbirda mustaqil Oʻzbekistonimizda qonun ustuvorligini taʼminlash, inson xaq-huquqlarini himoya qilish uchun keng qamrovli islohotlar amalga oshirilayotgani alohida qayd etildi. Soʻzga chiqqan masʼullar bu borada oʻz hududlarida qilayotgan ishlari xususida axborot berdilar. Fuqarolardan tushgan savollarga tegishlicha javoblar qaytardilar.

        Ural Umarov,

“Adolat” SDP Yakkabogʻ tuman     Kengashi raisi.