Inson qadri ulugʻlangan yurtning kelajagi porloq boʻladi

“Adolat” SDP Chiroqchi tuman Kengashi va tuman maʼnaviyat maʼrifat markazi tomonidan tuman madaniyat markazi tadbirgohida “Oʻzbekiston – inson qadri ulugʻlangan yurt”   loyihasi doirasida “Adolat – inson qadri uchun”mavzusida tadbir boʻlib oʻtdi. Mamlakatimiz mustaqilligining 32 yilligi oldidan oʻtkazilgan tadbirda partiya faollari, oʻqituvchilar, tibbiyot xodimlari hamda keng jamoatchilik vakillari qatnashdi.

Shuni alohida qayd etish kerakki, Yangi Oʻzbekiston taraqqiyot strategiyasida bosh mezon etib belgilangan “Inson qadri uchun” degan tamoyil har bir fuqaro uchun munosib turmush sharoitini yaratishni nazarda tutadi. Yangi hayot uchun, Yangi Oʻzbekiston uchun shiori ostida olib borilayotgan keng qamrovli islohotlarda har bir yurtdoshimiz faol ishtirok etmoqda. Shu tufayli ham mamlakatimizda fuqarolar haq-huquqlarini taʼminlash, farovon turmushi uchun keng imkoniyatlar yaratish borasida katta ishlar qilinyapti. Serquyosh mamlakatimizda oʻtgan 32 yil davomida qilingan ishlarga nazar tashlaydigan boʻlsak, buyuk oʻzgarishlar yuz berganligiga guvoh boʻlamiz. Yurtimizda har bir sohada roʻy berayotgan oʻzgarishlar avvalo inson uchun yaratilayotgan qulayliklarning yorqin ifodasidir.

Tadbirda soʻzga chiqqan xalq deputatlari tuman Kengashi deputati Farhod Jumanov, xalq deputatlari viloyat Kengashi deputati Abduqahhor Ahmedovlar ham Oʻzbekistonda inson qadrini ulugʻlash uchun Prezidentimiz tomonidan katta ishlar qilinayotganini alohida eʼtirof etishdi.

    — Darhaqiqat, ulugʻ ayyom kunlarida ham yoshlar va xotin-qizlar, koʻngli oʻksik insonlarga berilayotgan eʼtibor yurtimizning kelajagi naqadar porloq ekanligidan dalolatdir,-dedi tadbirda xalq deputatlari Qashqadaryo viloyat Kengashi deputati Abduqaxxor Ahmedov.- Mamlakatimizda aholining ijtimoiy himoyaga muhtoj qatlami, nogironligi boʻlgan va koʻp bolali oilalarni qoʻllab-quvvatlash koʻlami kengayib, bu borada mustahkam tizim yaratildi. Istiqlol bayramimizning “Har bir kun, bu — imkoniyat, har bir kun, bu — kelajak uchun poydevor” degan hayotiy shiori ahamiyatini aynan inson huquqlari talqini timsolida teran ochib berishda ham muhim oʻrin tutadi. Shu kecha-kunduzda partiyamiz faollari homiylar bilan hamkorlikda 20 dan ortiq kam taʼminlangan oilalarga tashrif buyurib ular holidan xabar olyapmiz. Moddiy koʻmak koʻrsatyapmiz. Bu kabi xayrli va savob ishlarimizni yil oxirigacha davom ettiramiz.

Bayram arafasida mahallalarda obodonlashtirish ishlari yoʻlga qoʻyilyapti. Hashar uyushtirib, koʻcha xiyobonlar obod etilayotir. “Yosh adolatchilar” qanoti faollaridan iborat guruh aʼzolari esa kasalmand boʻlib toʻshakda yotib qolgan oilalar holidan xabar olib, xonadonlarini obodonlashtirishga hissa qoʻshmayaptilar.

Umuman, partiyamiz aʼzolari bu yilgi istiqlol shukuhi har bir xonadonda aks etishi uchun harakat qilyaptilar. Bayramni koʻtarinki ruhda oʻtkazish choralari koʻrilyapti.

Sobir Axmedov,

  Partiya faoli.