“Inson qadri ulugʻ-xotira muqaddas”

9-may yurtimizda keng miqyosda “Xotira va qadrlash kuni” katta tantanalar bilan nishonlanib, 1941-1945 yillar urush va mehnat frontida tinchlik uchun kurashib halok boʻlgan jasur va matonatli oʻgʻlonlar xotirasi yod etiladi hamda urush va mehnat frontida jasorat koʻrsatgan nuroniylarimiz eʼzozlanishi xalqimizga xos qadriyatlar koʻzgusi sanaladi. Azaliy qadriyatlarni xalqimiz orasida saqlash va ertangi kun egalarini shu ruhda tarbiyalash uchun, mamlakatimizda tadbirlar olib borilmoqda.

Mana shunday tadbirlardan yana biri “Inson ulugʻ-xotira muqaddas” nomi ostida, Kogon shahridagi Ziyokor MFYsida “Buvijonlar maktabi” jamoatchilik guruhi aʼzolari tomonidan tashkil etildi.Tadbirda “Adolat” SDP Kogon shahar kengashi raisi M.Hamroyeva, targʻibot guruhi rahbari G.Suvonova, bosh otinoyi M.Huseynova, mehnat faxriylari, maktab oʻqituvchilari va oʻquvchilar hamda mahalla faollari ishtirok etishdi.

Tadbirda soʻzga chiqqanlar urushga ketib, qaytmagan insonlarni xotirlab, ularning hayot yoʻllari xususida xotiralarni soʻzlab berdilar. Shu maskanda ishlab, nafaqada boʻlgan, oʻtib ketgan ustozlarni yod olib va ularning qilgan ezgu ishlarini yod etishdi. Aqniqsa, mazkur maktabda faoliyat yuritgan Salomovlar sulolasi chiqishlari davraga oʻzgacha shukuh bagʻishladi.

Kogon shahar bosh otinoyisi M.Huseynova soʻzga chiqib, uchrashuv ishtirokchilarini bayram bilan tabriklab, tashkilotchilarga oʻz minnatdorchiliklarini bildirdilar. Tadbirda maktab oʻquvchilari tomonidan konsert dasturi namoyish etildi.Kecha soʻngida dasturxon atrofida oʻtganlarning ruhi poklariga bagʻishlab, qurʼon tilovat qilindi.  

Mohigul Rahimqulova,

“Adolat” SDP Buxoro viloyat Kengashi matbuot kotibi.