“Insonga eʼtibor – kelajakka eʼtibor”

Mamlakatimizda olib borilayotgan keng koʻlamli islohotlar jamoat tashkilotlari, siyosiy partiyalar faoliyatini ham takomillashtirib, aholimizning jamiyat va davlat hayotidagi faolligini oshirishga xizmat qilib kelmoqda.

Aytish joizki, yurtimizda jadal ravishda olib borilayotgan islohotlardan koʻzlangan pirovard maqsad bitta – xalqimizni hayotdan rozi qilish, boy qilishdan iborat.

Bunga odamlarni tadbirkorlikka, ishbilarmonlikka oʻrgatish, kichik biznes va tadbirkorlik sohasini qoʻllab-quvvatlash va ragʻbatlantirish, teng va adolatli qonuniy imkoniyatlar yaratish orqali erishish mumkinligi amaliyotda oʻz natijasini koʻrsatmoqda.

Kuni kecha Boʻka tumani markazida koʻpdan kutilgan “Zar lochin” savdo majmuasini foydalanishga topshirilishi ham fikrimizga yorqin misol boʻla oladi.

Savdo majmuasining tantanali ochilish marosimida Oʻzbekiston “Adolat” SDP Toshkent viloyati Kengashi raisi Farmon Allaev, tuman hokimligi mutasaddilari, mehnat faxriylari hamda partiya faollari ishtirok etishib, boʻkaliklarni ana shunday savdo markazining qurib, foydalanishga topshirilgani bilan samimiy tabrikladilar.

Tantanali tadbirda soʻzga chiqqanlar mamlakatimizda soʻnggi yillarda amalga oshirilayotgan islohotlar xalq farovonligi va aholi maʼmurchiligini taʼminlash, xizmatlar koʻrsatish sifati va samaradorligini oshirishda muhim omil boʻlayotganini taʼkidlashdi.

Alvon lenta kesilib, mehmonlar savdo obyektida amalga oshirilgan bunyodkorlik ishlari va tadbirkorlarga yaratilgan shart-sharoit bilan ham yaqindan tanishdilar.

Ikki qavatdan iborat mazkur zamonaviy inshoot xalq taʼbiri bilan aytganda, “uzukka qoʻyilgan koʻz misoli” hudud qiyofasini yanada koʻrkam qildi. Aholining talab va ehtiyojlarini inobatga olgan holda yaxlit majmua qurib foydalanishga topshirilgani savdo va xizmat koʻrsatish sohasida qoʻlga kiritilayotgan salmoqli yutuq desak, mubolagʻa boʻlmaydi.

Unda kiyim-kechak boʻlimlari, mahsulot assortimentining xilma-xilligi, xaridorlarning istalgan turdagi zarur mahsulotlarni bir joyning oʻzidan topish imkonini berayotgani ortiqcha ovoragarchiliklarning oldini oladi. Bir soʻz bilan aytganda, majmua xaridorlar uchun qoʻshimcha qulayliklar yaratish maqsadida barpo etildi.

– Bugungi kunda majmuaning ichki qismida turli hajmdagi savdo va maishiy xizmat koʻrsatish doʻkonlari tayyor holga keltirilgan boʻlib, tadbirkorlarga qulaylik yaratib berilgan, – deydi Oʻzbekiston “Adolat” SDP Toshkent viloyati Boʻka tuman Kengashi raisi Xurshida Abidova. Bu yerda sotuvchilar uchun ham, xaridorlar uchun ham barcha sharoitlar yaratilgan. Tumandagi eski buyum va oziq-ovqat bozorlaridan yana bir farqi shundaki, majmuada barcha xavfsizlik va sanitariya qoidalariga rioya etish choralari koʻrilgan. Yongʻin xavfsizligini taʼminlash masalasi alohida eʼtiborga olingan. Ozodalikni saqlash uchun zarur qulayliklar mavjud. Majmuada 40 ta yangi ish oʻrni yaratildi. Mazkur savdo majmuasi keng maydonda barpo etilgani uchun xaridorlar emin-erkin harakatlanish imkoniyatiga ega. Toza va ozodaligidan dil yayraydi. Tumanimizda amalga oshirilayotgan bunday yangilanishlar, oddiy xalq manfaatiga xizmat qilayotgani eʼtirofga molik. Savdo majmuasining foydalanishga topshirilishi aholiga bir olam quvonch ulashdi.

“Adolat” SDP Toshkent viloyati Kengashi Matbuot xizmati.