“Internet foydalanish va axborot tarqatish madaniyati”

Dunyoda internet deb atalmish oʻrgimchak toʻri ixtiro qilingandan beri uning tinmay rivojlanishi oqibatida u faqat maʼlumotlar taqdim etish va qabul qilish bilan cheklanib qolmay, bundan ham katta hajmdagi ishlarni olib borishga xizmat qilmoqda.

Hayotimizning barcha jabhalarida internet yordamida osonlik, arzonlik va tezlik foydalarini koʻzlaydigan boʻldik.Ammo, bizning mushkulimizni oson qilayotgan mana shu internetdan nechogʻlik samarali foydalanamiz? Undan foydalanish madaniyatimiz qay darajada?

Oʻzbekiston “Adolat” SDP Toshkent viloyati Kengashi tomonidan Boʻka tumani “Boʻston” MFY dagi Madaniyat saroyida tashkil etilgan davra suhbatida ham mazkur savollarga javob izlanib, masalaga katta eʼtibor qaratildi.

Unda partiya Toshkent viloyat Kengashi raisi Farmon Allayev, Boʻka tuman Kengashi raisi Xurshida Abidova, tuman Profilaktika katta inspektori, kapitan Farxod Urazbayev, Yoshlar ishlari agentligi tuman boʻlimi boshligʻi Odil Joʻraev va yoshlar ishtirok etishdi.

Tadbirda soʻzga olgan “Adolat” SDP Toshkent viloyat Kengashi raisi Farmon Allayev jahonda shiddat bilan taraqqiy etib borayotgan AKT tizimi va internet tarmogʻidan samarali foydalanish yoshlarning ijodiy tafakkurlarini rivojlantirib, oʻzligini namoyish etishlariga imkon berayotganligi xususida fikr yuritdi.

Bugungi kunda oʻsib kelayotgan yosh avlodning axborot madaniyatini shakllantirish kechiktirib boʻlmaydigan masalalardan biri hisoblanishini taʼkidladi.

Dunyo boʻyicha son-sanoqsiz odamlar internet xizmatlaridan foydalanmoqdalar, axborot almashayotgani, oʻz bilimlarini oshirishmoqda hamda turli masalalarni zudlik bilan hal qilayotgan bir pallada oʻquvchi yoshlarning soni ham kengayib borayotganligi, bu esa sohada tushuntirish va targʻibot ishlari olib borishni taqozo qilishini qayd etdi.

Internet paydo boʻlgandan beri baʼzilar uni ijobiy baholashsa, baʼzilar salbiy tomonlarini koʻradi. Bu mavzudagi maqbul qarash shuki, internet ham televizor, radio kabi bir vosita. Uni yaxshilikka ishlatilsa yaxshi, yomonlikka ishlatilsa yomon narsaga aylanishini uqtirdi.

Internet olamidagi badniyat, manfur kimsalarning tuzogʻiga tushib qolmaslik uchun ham undan toʻgʻri foydalanishni oʻrganish lozimligini taʼkidladi.

Davra suhbatida soʻz olgan boshqa mutasaddilar ham bu yerdagi eng muhim omil – inson omili ekanini alohida taʼkidlashdi. Ularning fikricha, inson bir paytning oʻzida toʻgʻri maʼlumot ham, yomon maʼlumot ham tarqatishi mumkin. Uning muqobilida oʻquvchi-yoshlar tushunib-tushunmay har qanday yaxshi yoki yomon maʼlumotni qabul qilib olishi mumkin. Demak, oʻqituvchi-murabbiylarning muhim vazifasi — internetdan foydalanayotgan yosh avlodga toʻgʻri yoʻlni koʻrsatish, zararli oqibatlardan ogohlantirishdir.

Tadbirda soʻz olganlar mavzuga doir oʻz mulohazalarini bildirishdi. Tadbir soʻnggida unda ishtirok etgan qatnashchilarning mavzu doirasidagi fikr-mulohaza, takliflari tinglanib, qizgʻin muhokama qilindi. Ishtirokchilar “Adolat” SDP Toshkent viloyati Kengashi tomonidan tashakkurnomalar bilan taqdirlandilar.

“Адолат” СДП Тошкент вилояти Кенгаши Mатбуот хизмати.