Ishonchli vakil Shirin shahri saylovchilar bilan uchrashdi

Yurtimizda muhim siyosiy tadbir – Prezident sayloviga tayyorgarlik jarayoni qizgʻin pallaga kirdi. Ayni paytda saylov kompaniyasining muhim bosqichlari boshlanmoqda. Bu birinchi navbatda saylov huquqiga ega boʻlgan Oʻzbekiston fuqarolarining saylovchilar roʻyxatiga kiritilgan hamda nomzodlarning saylov oldi tashviqoti jarayonlari bilan ahamiyatlidir. Saylov uchastkalari saylovchilarga qulaylik yaratish maqsadida har tomonlama shinam va koʻrkam binolarga joylashtirildi. Shuningdek, saylovchilar roʻyxati yagona elektron roʻyxatdan saylov uchastkalariga bosqichma — bosqich taqsimlanmoqda. Joylarda Oʻzbekiston Respublikasi Prezidentligiga nomzodlarning ishonchli vakillari saylovchilar bilan uchrashmoqda. Bugun “Adolat” sotsial-demokratik partiyasi tomonidan Prezidentlikka nomzod sifatida koʻrsatilgan Robaxon Maxmudovaning Sirdaryo viloyatidagi ishonchli vakili Nodira Djanibekova bilan uchrashuvi boʻlib oʻtdi. Shirin shahri Yoshlar markazida tashkil etilgan uchrashuvda mahalla faollari, mehnat faxriylari, deputatlar, partiya faollari, yoshlar,xotin qizlar, keng jamoatchilik va OAV vakillari ishtirok etishdi.

Tadbirni Oʻzbekiston “Adolat” sotsial-demokratik partiyasi Sirdaryo viloyat Kengashi rais oʻrinbosari B.Abdullayev   kirish soʻzi bilan ochib berdi. U oʻz nutqida yigʻilganlarni yurtimizda kechayotgan oʻta muhim siyosiy jarayonlar bilan qizgʻin muborakbod etib, ushbu saylovoldi tadbirlarining kelgusida yurtimiz ravnaqi va fuqarolarimiz farovonligini taʼminlashdagi ahamiyatiga atroflicha toʻxtaldi.

Shundan soʻng, Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudovaning Sirdaryo viloyati boʻyicha ishonchli vakili Oliy Majlis Qonunchilik palatasi deputati Nodira Djanibekova saylovchilarni nomzodning saylovoldi dasturidan oʻrin olgan 9 ustuvor yoʻnalishni oʻzida mujassam etgan xalqchil gʻoya, maqsad va vazifalar mamlakatimizda soʻnggi yillarda amalga oshirilayotgan tub islohotlarni sifat jihatdan yangi bosqichga olib chiqishiga xizmat qilishini qayd etib, saylovchilariga saylovoldi dasturi boʻyicha batafsil maʼlumot berdi.

Uchrashuvda saylovoldi dasturidan oʻrin olgan boshqa vazifalar xususida ham ishtirokchilar tomonidan fikr va mulohazalar bildirildi, saylovchilar dastur boʻyicha oʻzlarini qiziqtirgan savollarga ishonchli vakil tomonidan javob olishdi. Uchrashuv yakunida ishonchli vakil barchani Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudova ovoz berishga chaqirdi.

“Adolat” SDP Sirdaryo viloyat Kengashi   Matbuot xizmati.