Islohot — islohot uchun emas, avvalo inson uchun

Otorinolaringologiya yoʻnalishi tibbiyot sohasining boshqa yoʻnalishlari kabi inson salomatligini asrashda muhim rol tutadi. Otorinolaringologiya — quloq, burun va tomoq haqidagi fan (otos — quloq, rhinos — burun, larynges — tomoq) boʻlib, ularni tuzilishini, vazifalarini, yaʼni eshitish, hid sezish aʼzolarini va nutq hosil boʻlishini, shuningdek, quloq, burun, tomoq kasalliklarini, ularning boshqa aʼzolar bilan bogʻliqligini oʻrganadi. Jumladan: eshitish analizatori — insonning dunyoni anglashida, nutq hosil boʻlishida hamda ikkilamchi signal tizim faoliyati asosini tashkil qiladi. Bundan tashqari vestibulyar analizator muvozanatni saqlashda, chamalashda, fazoda inson gavdasini tik tutib yurishida muhim ahamiyat kasb etadi. Hid hamda taʼm bilish analizatorlari inson hayotida muhim rol oʻynaydi. Yuqori nafas yoʻllarining shilliq qavatida koʻplab har xil turdagi retseptorlar (-mexano, -termo, -ximio va boshqalar) boʻlib, LOR aʼzolaridan tananing boshqa aʼzolari tizimiga reflektor taʼsir etib turadi. LOR aʼzolarining oʻtkir hamda surunkali kasalliklari oqibatida hayot uchun xavf soluvchi asoratlar, yaʼni otogen va rinogen meningit, miya abssessi, sinustromboz va sepsis kelib chiqishi tajribalarda koʻp uchragan.

Maʼlumotlarga koʻra, davolash muassasalariga murojaat qilgan bemorlarning 30 foizi Otorinolaringologiya yoʻnalishidagi yaʼni yuqori nafas yoʻllari yalligʻlanishi yoki quloq, tomoq va burun kasalliklari bilan murojaat qilishadi.

Shu boisdan ham aytish mumkinki, Oʻzbekiston Respublikasi Prezidenti Shavkat Mirziyoyev tomonidan qabul qilingan “Otorinolaringologiya xizmatini takomillashtirish va uning koʻlamini kengaytirish chora-tadbirlari toʻgʻrisida”gi Qarori ayni vaqtida qabul qilingan muhim hujjat.

Qarorda Otorinolaringologiya sohasida tibbiy yordam koʻrsatish sifatini yaxshilash, aholining ehtiyojmand qatlamlariga yuqori malakali ixtisoslashtirilgan tibbiy xizmatlar koʻlamini kengaytirish, sohadagi nodavlat tibbiyot tashkilotlari faoliyatini qoʻllab-quvvatlash, davlat muassasalarining moddiy-texnika bazasini yanada mustahkamlash, ilm-fanni rivojlantirish orqali aholiga sifatli tibbiy xizmat koʻrsatishni yanada yaxshilash, inson manfaatlarini taʼminlash masalasi bosh maqsad etib qoʻyilgan.

Qarorga koʻra 2023–2024-yillarda koʻp tarmoqli markaziy poliklinikalar, hududlardagi koʻp tarmoqli tibbiyot markazlari, bolalar koʻp tarmoqli tibbiyot markazlarini zamonaviy zarur tibbiy uskunalar bilan jihozlash uchun yoʻnaltirilayotgani sohada aholiga sifatli tibbiy xizmat koʻrsatishda muhim ahamiyat kasb etadi. Shu bilan bir qatorda zaif eshitadigan bolalar uchun Davlat byudjeti mablagʻlari hisobidan qoʻshimcha yiliga kamida 2 000 ta raqamli eshitish moslamalari bilan taʼminlash boʻyicha belgilangan vazifalar qanchadan — qancha oʻksik dillarga quvonch bagʻishlashi shubhasiz.

Qaror bilan yaqindan tanishib chiqar ekanman, xayolimga davlatimiz rahbari Shavkat Mirziyoyevning “...Biz hayotda oʻzini toʻla oqlagan “Islohot — islohot uchun emas, avvalo inson uchun” degan tamoyildan kelib chiqqan holda, ijtimoiy sohadagi islohotlarni, xalqimizning hayot darajasi va sifatini yuksaltirish yoʻlini davom ettiramiz.” degan soʻzlari keldi. Albatta, aholi salomatligi davlatimiz tomonidan yuritilayotgan ijtimoiy siyosatning muhim va ustuvor yoʻnalishlaridan boʻlganligi sababli uning huquqiy asoslari ham ushbu ustuvorlikka toʻla mos boʻlishi, mamlakatimizda yuz berayotgan barcha ijobiy oʻzgarishlarni oʻzida aks etishi, eng muhimi, inson, uning huquq va manfaatlari eng oliy qadriyat ekanligining yorqin namunasidir.

Tozagul Xoliqova,

Xalq deputatlari Samarqand viloyat Kengashi deputati,

Jomboy tuman tibbiyot birlashmasi rahbari.