Istiqbolni taʼlim va yosh avlod kamoli belgilaydi

“Adolat” SDP saylovoldi dasturida taʼlim taraqqiyotini taʼminlash yuzasidan muhim va dolzarb masalalar qamrab olingan. Mustaqil yurtimiz istiqboli, mamlakat kelajagi, barcha sohalar rivoji maktab taʼlimi bilan chambarchas bogʻliq ekanligi alohida eʼtirof etilgan. Shuni unutmaslik kerakki, ertangi farovon hayotimiz   bugun oʻsib-ulgʻayayotgan yoshlarning har tomonlama ilm-maʼrifatli, zamonaviy bilimlarni chuqur egallaganliklariga koʻp jihatdan bogʻliq. Shu tufayli ham Prezidentimiz najot taʼlimda, tarbiyada, bilimda ekanligini taʼkidlab, “Taʼlim-tarbiya – bu bizning kelajagimiz, hayot-mamot masalasi”, deya koʻp bora taʼkidlayaptilar .

Bugun “Adolat” SDP Koʻkdala tuman Kengashi tomonidan “Taʼlim sifati – partiya eʼtiborida” loyihasi doirasida “Taʼlim olishda yoshlarga yaratilgan imkoniyatlar: yutuqlar va muammolar” mavzusidagi tadbirda ham shular xususida soʻz yuritildi. Tuman xalq taʼlimi boʻlimi tadbirgohida uyushtirilgan tadbirda partiya faollari, oʻqituvchilar, yoshlar vakillari qatnashdi. Unda tuman Kengashi deputati Sharofat Umarova kun tartibidagi masala yuzasidan maʼruza qildi.

Mamlakatimizda davlatimiz rahbari boshchiligida maktab taʼlimini rivojlantirish uchun keng qamrovli islohotlar amalga oshirilyapti,- dedi Sharofat Umarova. — Kelgusi besh yillikda maktablarimizda 1 million 200 ming oʻquvchi oʻrni yaratilishi hisobiga taʼlim sifati mutlaqo yangi bosqichga olib chiqiladi. Taʼlim muassasalarida oʻqitish metodikasi, darsliklar, partadan tortib, maktablarning binosigacha qaytadan koʻrib chiqilishi, muallimlarga munosib sharoit yaratilishi belgilanyapti. Oʻz navbatida oʻqituvchilarning bilim va malakasi, dars oʻtishiga talab ham tubdan kuchaytiriladi.

Shundan soʻng tadbirda soʻzga chiqqan xalq deputatlari viloyat Kengashi deputati Abduqahhor Ahmedov, pedagog Farhod Jumanov va boshqalar yurtimizda “Yangi Oʻzbekiston maktab ostonasidan boshlanadi”, degan ezgu daʼvat ostida yosh avlod kamoli yoʻlidagi izchil islohotlar koʻlami kun sayin ortayotgani haqida toʻlqinlanib gapirdilar. Taʼlimdagi oʻzgarishlar birgina viloyatimiz xalq taʼlimi tizimi hayotida ham yaqqol namoyon boʻlayotir. Ayniqsa, bu borada bunyodkorliklar yanada keng qamrovga kirib, yaqin yillarda viloyatda 50 ta yangi maktab barpo etish, 500 ga yaqin ilm maskanini taʼmirlash   koʻzda tutilgan.

Tadbirda taʼlimda barcha mezonlar sifat, samaradorlik va natija bilan baholanishi qayd etildi. Shuningdek, oʻqituvchilarning oʻz ustida mustaqil ishlashi, tashabbuslarga intilib faoliyat yuritishi ham muhim ahamiyatga ega. Oʻquvchilarga umumtaʼlim fanlarini chuqur oʻrgatish bilan bir qatorda maʼnaviy-maʼrifiy ishlar samaradorligini oshirish doimiy diqqat markazimizda boʻlishi zarur.

Tadbirda taʼlim sifati va samaradorligini oshirish yuzasidan kelgusidagi vazifalar belgilab olindi.

Venera Xusainova,
“Adolat” SDP Koʻkdala tumani Kengashi raisi.