Jarayon koʻtarinki ruhda oʻtdi

Oʻtayotgan har bir onimiz bizni mamlakatimizdagi katta siyosiy jarayon – 30 aprelda boʻlib oʻtadigan umumxalq referendumi sari yaqinlashtirmoqda. “Adolat” SDP Namangan shahar kengashi faollari ham ham vaqtdan unumli foydalanib, yangilanayotgan Konstitutsiyamiz haqida koʻproq maʼlumotlarni oʻz elektorati va keng jamoatchilikka yetkazish, ularning siyosiy va huquqiy bilimlarini oshirish maqsadida turli tadbirlar oʻtkazib kelmoqda. Bunda partiyaning hududdagi “Ayollar qanoti” va “Yosh adolatchilar” qanoti aʼzolari alohida faollik koʻrsatmoqda.

Ana shunday tadbirlarning navbatdagisi shahardagi Abu Ali ibn Sino nomidagi salomatlik texnikumida boʻlib oʻtdi. “Referendum oʻtkazish tartibi va uning saylovlardan farqi” mavzusidagi ushbu davra suhbatida texnikumning oʻqituvchi va talabalari ishtirok etdilar. Unda Namangan shahar partiya Kengashi raisi Mirzarahmat Olimov, viloyat Kengashi raisi oʻrinbosari Yorqinoy Hojimatova, Oliy Majlis Qonunchilik palatasi huzuridagi Yoshlar parlamenti aʼzosi Abbos Usmonxoʻjayev, Davlatobod tuman Kengashi raisi v.b Nodirbek Gʻoziyev mavzu yuzasidan oʻz fikr mulohazalarini bildirdilar. Referendumni oʻtkazish jarayonlari, tartibi va saylovlardan farqli tomonlari xususida atroflicha tushunchalar berdilar. Yangilanayotgan Konstitutsiyaning moddalaridan iqtibos keltirib, ularni tarixda roʻy bergan voqea hodisalardan hikoya qilgan xolda, hayotimizda qanchalik muhim oʻrin tutishini tushuntirib berdilar.

Tadbir davomida texnikum talabalari ham faol qatnashib, Konstitutsiya haqidagi mushohadalari bilan oʻrtoqlashdilar, ayrim moddalarni yoddan aytib, ularni nechogʻli ahamiyatli ekanligini sharhlab berdilar. Shuningdek, oʻzlarini qiziqtirgan savollariga maʼruzachilardan toʻlaqonli javob oldilar.

Tadbir fikr-muloxazalarga boy tarzda, koʻtarinki kayfiyatda oʻtdi. Texnikum oʻqituvchi va talabalari bunday uchrashuv uchun tashkilotchilarga alohida minnatdorchiliklar bildirdilar.

Nurbek Abdullayev,
“Adolat” SDP Namangan viloyat Kengashi matbuot kotibi.