Jizzaxda qandli diabetga qarshi kurashish kuni munosabati bilan tibbiy koʻrik oʻtkazildi

Bugungi kunda inson omilini kuchaytirish oilalar salomatligini mustahkamlash davlatimiz siyosatining ustuvor yoʻnalishlaridan biriga aylanib bormoqda. Chunonchi, kelajagi buyuk davlat qurish, unda yashayotgan xalqlarning hech kimdan kam boʻlmagan tarzda hayot kechirishini taʼminlash mamlakatimizning dunyo miqyosida nufuzi hamda obroʻsini koʻtarishda muhim omil boʻlib xizmat qilmoqda. Shuning uchun ham bu borada qator qonunlar, Prezident farmonlari hamda qarorlari qabul qilinmoqda. Olib borilayotgan ishlar natijasida turli kasalliklarni oldindan aniqlash va davolash borasida ulkan yutuqlarga erishilmoqda.

Bugun “Adolat” sotsial-demokratik partiyasi tomonidan ham butun respublikamiz boʻylab mamlakatimizda keng tarqalib borayotgan kasalliklardan biri hisoblangan qandli diabet kasalligini oldini olish, ushbu kasallikka chalinmaslik uchun insonlarga kerakli tavsiyalarni berish maqsadida tibbiy koʻriklar tashkil etilmoqda.

Xususan, partiyaning Jizzax viloyat Kengashi tomonidan ham “14-noyabr — Xalqaro diabetga qarshi kurash kuni” munosabati bilan viloyat Endokrinologiya markazi bilan hamkorlikda tibbiy koʻrik oʻtkazildi.

Qandli diabetga moyilligi bor aholi qatlamini aniqlash, bemorlarga davo-tashxis yordamini koʻrsatish maqsadida oʻtkazilgan mazkur koʻrikda Akademik Yo.X.Toʻraqulov nomidagi Respublika ixtisoslashgan endokrinologiya ilmiy-amaliy tibbiyot markazi endokrinologi, tibbiyot fanlari professori Barno Shagazatova, viloyat Endokrinologiya markazi bosh shifokori Ozodbek Mavlonov, Oʻzbekiston milliy universiteti Jizzax filiali oʻqituvchilari, oʻsmirlar shuningdek aholining katta yoshdagi qatlami vakillari ishtirok etishdi.

Soha mutaxassislari tomonidan tadbir ishtirokchilariga yurak qontomir kasalliklari, qandli diabet kabi yuqumli boʻlmagan kasalliklar butun dunyoda nogironlik darajasini ortishiga va bevaqt oʻlimlar soni koʻpayishiga sabab boʻlayotgani, bu kasalliklarning kelib chiqishiga tamaki va alkogol mahsulotlarini haddan tashqari koʻp isteʼmol qilish, jismoniy faollikni sustlashishi, ortiqcha tana vazni, meva va sabzavotlarni yetarlicha isteʼmol qilmaslik kabi xavfli omillar sabab boʻlayotgani, qandli diabet va uning asoratlari, davolash usullari haqida tushunchalar berildi.

“Adolat” SDP Jizzax viloyat Kengashi

Matbuot xizmati.