Kafolatlangan tibbiy xizmat taʼminlanadi

“Adolat” SDP Muborak tuman Kengashi tomonidan tibbiyot birlashmasida “Aholining tibbiy madaniyatini oshirish, sogʻliqni saqlash tizimiga zamonaviy axborot-kommunikatsiya texnologiyalarini joriy etish” mavzusida tadbir boʻlib oʻtdi. Tadbirda tibbiyot xodimlari bilan birgalikda keng jamoatchilik vakillari ham ishtirok etdi. Mamlakatimizda Oʻzbekiston Respublikasining yangi Konstitutsiyasi qabul qilindi. Unda inson manfaatlari har narsadan ustun ekanligi belgilab qoʻyilgan. Prezidentimizning tegishli qarori asosida bepul tibbiy yordam koʻrsatish tizimi joriy etilgan. Unda davlat sogʻliqni saqlash xizmatlarining kafolatlangan hajmi doirasida bepul tibbiy yordam koʻrsatilishini taʼminlashi belgilangan. Kafolatlangan xizmatlar doirasiga barcha xizmatlar, shoshilinch, shoshilinch tibbiy yordam, bir qator yuqumli kasalliklar boʻyicha birlamchi tibbiy-sanitariya yordami, ijtimoiy ahamiyatga ega kasalliklar va xavfli kasalliklar boʻyicha ixtisoslashtirilgan tibbiy yordam koʻrsatish kiradi. Bugun partiya faollari va tibbiyot muassasalari masʼullari tomonidan tashkil etilgan tadbirda ham shular xususida soʻz yuritildi.

-Yurtimizda prezidentimiz boshchiligida tibbiyot sohasini isloh qilish, uni xalqqa yaqinlashtirish borasida keng qamrovli ishlar olib borilyapti,-dedi xalq deputatlari Muborak tuman Kengashi deputati Ilhom Norboʻtayev. – Aholining tibbiy madaniyatini oshirish, sohaga axborot texnologiyalarini joriy etishga katta eʼtibor berilyapti. Sogʻliqni saqlashning birlamchi boʻgʻinida va qator davlat davolash-profilaktika muassasalarida, avvalo, qishloq joylardagi tibbiy xizmat koʻrsatish muassasalarini zamonaviy jihozlashga jiddiy ahamiyat qaratilyapti.

-Serquyosh yurtimizda keyingi yillarda barcha sohalarda boʻlgani kabi tibbiyot tizimida olib borilayotgan islohotlar ham izchil davom ettirilmoqda,- dedi partiya faoli Pirnazar Nematov.- Aholi salomatligini saqlash borasida yangi Konstitutsiyamizda ham har kim sogʻligʻini saqlash va malakali tibbiy xizmatdan foydalanish huquqi aniq tiniq belgilab qoʻyilgan. Har bir fuqaro tibbiy yordamning kafolatlangan hajmini davlat hisobidan olishga haqlidir. Shu asosda belgilangan ustuvor vazifalar ijrosini taʼminlash, tibbiyot xodimlarining salohiyatini oshirish uchun zarur shart-sharoitlar yaratilmoqda. Bu borada avvalroq jamoatchilik tomonidan tibbiy xizmatlar koʻlami va sifatini oshirish yuzasidan bildirilgan takliflar inobatga olinib, aholiga qulay boʻlgan “Elektron poliklinika” tizimi yoʻlga qoʻyildi.

Tadbirda soʻzga chiqqanlar   aholiga kafolatli   tibbiy xizmat koʻrsatish, tibbiyot xodimlari mehnatini ragʻbatlantirish, zamonaviy texnologiya va davolash usullarini keng joriy qilish yuzasidan oʻz fikr mulohazalarini bildirdilar. Tadbir savol-javob asosida tashkil etilgani bois qiziqarli kechdi.

Zamira Rasulova,

“Adolat” SDP Muborak tuman Kengashi faoli.