Kasblar ichra eng sharafli kasb

Rossiyalik olimning ilmiy ishida keltirilgan statistik ma’lumotlarga ko‘ra, o‘qituvchilar vaqtlarining 79 foizini tik oyoqda o‘tkazadi, o‘qituvchilarning 50 foizi kuniga sakkiz soat o‘rniga olti soatdan kam uxlaydi, O‘QITUVChIlarning 2/3 qismi doimiy stress ostida. Stressning eng yuqori darajasi - direktorlar va ularning o‘rinbosarlari orasida, o‘rtachadan yuqorisi - aniq fanlar, lingvistik fanlar va boshlang‘ich sinf o‘qituvchilari orasida ekanligi aniqlangan.

Darhaqiqat, o‘qituvchilik kasbi kasblar ichida eng ulug‘i, nafaqat sharaflisi va faxrli balki g‘oyatda mas’uliyatli kasb. Chunki ular kelajak avlodning ta’lim-tarbiyasiga mas’ul. Axir yurtimiz farzandlarining kelajagi ular yoshlikda o‘rgangan bilimlar bilan belgilanadi.
Bugungi kunda Prezidentimiz tomonidan ta’lim sohasiga, o‘qituvchilarga juda katta e’tibor qaratilib, soha xodimlari har tomonlama qo‘llab-quvvatlanmoqda, ularning oylik maoshlari oshirilmoqda. Faoliyat olib borishlari uchun qo‘lay imkoniyatlar yaratilmoqda. O‘qituvchining obrusini oshirish, maqomini yuksaltirish borasida dadil qadamlar tashlanmoqda. Kuni kecha davlatimiz rahbari Shavkat Mirziyoev boshchiligida o‘tkazilgan maktablarda ta’lim sifatini yana-da oshirish, o‘quvchi o‘rnini ko‘paytirish hamda o‘qituvchilar malakasini oshirish va ularga munosib sharoit yaratish bo‘yicha ustuvor vazifalar yuzasidan videoselektor yig‘ilishi ham yuqoridagi qayd etilgan islohatlarning davomi bo‘ldi desam yanglishmayman.

Yig‘ilish avvalida davlatimiz rahbari “...o‘qituvchiga e’tibor – bu avvalo farzandlarimizga, ularning ta’lim-tarbiyasiga e’tibor, degani. O‘qituvchining obro‘si oshsa, maktabning obro‘si oshadi, ilmning, ta’lim-tarbiyaning qadri ko‘tariladi. Shu sababli, muallim va o‘quvchilar uchun sharoitlarni yaxshilash, ta’lim sifatini oshirishga alohida e’tibor qaratayapmiz” deb ta’kidlab o‘tdilar. Aytib o‘tish joizki, pedagog xodimlarning samarali faoliyat olib borishlari uchun keng imkoniyat va shart-sharoitlar yaratilmoqda. Ayniqsa, sohani rivojlantirishga alohida hissa qo‘shgan, yuqori malakali, o‘z ustida ishlaydigan muallimlarni yangi yondashuvlar asosida qo‘llab-quvvatlash tizimi yaratilishi — ta’lim sohasida ishlovchi ustoz-murabbiylarning yana-da ko‘proq mehnat qilishiga va izlanishiga turtki bo‘ladi deb ayta olaman.

Albatta, bu beqiyos imkoniyatlarning zamirida, soha xodimlariga o‘qituvchilarga bildirilgan ishonch va ulkan mas’uliyat mujassam.
Hech bir ustoz o‘z shogirdi haqida “ustozi to‘g‘ri ta’lim-tarbiya bermabdi” degan so‘zlarni eshitmasin, yoshlarimizning bilimdonligi, yutuqlarini ko‘rib, “ustozingga rahmat” deyishsa, muddao shudir. Sohaga, o‘qituvchiga e’tibor – bu avvalo farzandlarimizga, ularning ta’lim-tarbiyasiga e’tibor, degani.

Muhiba Bababekova,
Xalq deputatlari Samarqand shahar Kengashi deputati