Kimki uzoq va sogʻlom hayot kechirishni istasa toʻgʻri ovqatlansin

“Adolat” SDP Mirishkor tuman Kengashi va tuman tibbiyot birlashmasi tomonidan Jeynov MFY tadbirgohida Prezidentimizning “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi qarori targʻiboti asosida “Toʻgʻri ovqatlanish va sogʻlom turmush tarzi” mavzusida tadbir boʻlib oʻtdi. Partiya faollari, tibbiyot xodimlari, keng jamoatchilik va ommaviy axborot vositalari vakillari ishtirok etgan targʻibot tadbirida xalq deputatlari Mirishkor tuman Kengashidagi Oʻzbekiston “Adolat” SDP deputatlik guruhi rahbari, shifokor Abdujabbor Kenjayev maʼruza qildi. 

-Xalqimiz oʻrtasida sogʻlom ovqatlanish madaniyatini shakllantirish uzoq davom etadigan jarayon,-dedi Abdujabbor Kenjayev.-Albatta bu maqsadga erishish uchun barchamiz bir yoqadan bosh chiqarib faoliyat yuritishimiz kerak. Shuni unutmaslik kerakki, har kimning sogʻligʻi oʻzi uchun kerak. Shunday ekan, sogʻlom va toʻgʻri ovqatlanish madaniyatiga rioya etish har birimizning shiorimiz boʻlmogʻi kerak.

-Mamlakatimiz aholisi orasida yuqumli boʻlmagan kasalliklarning oldini olish, sogʻlom turmush tarzini shakllantirish va jismoniy faolligini har tomonlama oshirish uchun “Toʻgʻri ovqatlanish va sogʻlom turmush tarzi” umummilliy harakati yoʻlga qoʻyilmoqda,- dedi partiya faoli Sarvinoz Abdullayeva.- Xalqimizning uzoq umr koʻrish davomiyligini taʼminlash hamisha dolzarb boʻlib kelgan va oʻta muhim boʻlib qolaveradi. Bu koʻrsatkich xalqimizning sogʻlom turmush tarzi va farovon hayoti ifodasidir. Davlatimiz tomonidan aholining sogʻlom ovqatlanishini taʼminlash boʻyicha barcha chora-tadbirlar koʻrilyapti. Prezidentimizning Samarqand shahrida oziq-ovqat xavfsizligiga bagʻishlab oʻtkazilgan xalqaro konferensiya ishtirokchilariga yoʻllagan xatida ham bu masalaga alohida eʼtibor qaratilgan.

Tadbirda partiya faollari va sogʻliqni saqlash sohasi vakillari tomonidan yoshlar va xotin qizlar, keksalar orasida sogʻlom ovqatlanishni tashkil etish hamda jismoniy faollikni targʻib qilish hisobiga yuqumli boʻlmagan kasalliklarning oldini olish, zararli odatlar, nosogʻlom turmush tarzini kechirish oqibatlari boʻyicha keng tushunchalar berildi. Tadbirkorlar tomonidan ishlab chiqarilayotgan oziq-ovqat mahsulotlarining sifatiga alohida eʼtibor qaratish zarurligi, shuningdek, yetishtirilayotgan qishloq xoʻjalik mahsulotlari tarkibidagi ximikatlar ham meʼyorida boʻlishi maqsadga muvofiqligi taʼkidlandi. Aholining toʻgʻri va sogʻlom ovqatlanishini tashkil etishda eng avvalo mahallalar faollari koʻproq targʻibot qilishlari kerakligi uqtirildi.

                                              Toʻlqin Xidirov,

                                              Partiya faoli.