Konstitutsion huquqimdan foydalanib, oila aʼzolarim bilan birgalikda referendumda vatanimiz ravnaqi, xalqimiz farovonligi, farzandlarimiz kelajagi yo‘lida adolatli jamiyat uchun ovoz berdim

Muhiba Bababekova, O‘zbekiston “Adolat” SDP Samarqand viloyat Kengashi raisi, xalq deputatlari Samarqand shahar Kengashi deputati:

Davlat va jamiyat hayotida siyosiy partiyalarning rolini kuchaytirish, ular o‘rtasida sog‘lom raqobat muhitini shakllantirish, davlat va jamiyat qurilishini takomillashtirishga yo‘naltirilgan demokratik islohotlarni chuqurlashtirish va mamlakatni modernizatsiya qilishda siyosiy partiyalarning rolini yana-da kuchaytirish bugungi kundagi eng asosiy vazifa hisoblanadi. Buning yorqin misoli sifatida siyosiy partiyalarning Bosh vazir nomzodini ko‘rsatish jarayonidagi ishtirokini alohida ko‘rsatib o‘tish lozim.

Yangilanayotgan Konstitutsiyada ilg‘or xorijiy tajribalar inobatga olinib, Bosh vazir nomzodini ko‘rib chiqish va maʼqullash vakolati Qonunchilik palatasining mutlaq vakolatiga o‘tkazilmoqda. Endilikda Bosh vazir nomzodini Qonunchilik palatasiga taqdim qilishdan oldin Prezident tomonidan barcha siyosiy partiyalar fraksiyalari bilan maslahatlashuvlar o‘tkazish tartibi joriy etilmoqda. Qonunchilik palatasi maʼqullaganidan keyin Prezident Bosh vazirni lavozimga tayinlaydi. Amaldagi tartibga ko‘ra, Bosh vazir nomzodini ilgari surish faqat Qonunchilik palatasiga saylovda eng ko‘p ovoz olgan partiya irodasiga bog‘lab qo‘yilgan. Yangi taklif etilayotgan tartib orqali esa barcha siyosiy partiyalar fraksiyalarining Bosh vazir nomzodini ko‘rib chiqishdagi ishtiroki taʼminlanadi. Yaʼni, bu boradagi qoidalar yana-da demokratlashtirilmoqda. Mazkur o‘zgarishni mamlakatimizda ijtimoiy-siyosiy islohotlar jarayonlarida barcha siyosiy partiyalarni faollashtirish va ularning hukumat shakllanishi va faoliyatiga taʼsirini oshirish orqali parlament nazoratini kuchaytirishning samarali mexanizmlarini yaratishga qaratilgan navbatdagi muhim qadam sifatida eʼtirof etsak bo‘ladi.

Bugun men o‘z Konstitutsion huquqimdan foydalanib, oila aʼzolarim bilan birgalikda referendumda vatanimiz ravnaqi, xalqimiz farovonligi, farzandlarimiz kelajagi yo‘lida adolatli jamiyat uchun ovoz berdim.