Konstitutsiya — baxtimiz qomusi

Shu kunlarda Oʻzbekiston “Adolat” sotsial demokratik partiyasi tomonidan “Oʻzbekiston Respublikasi Konstitutsiyasi toʻgʻrisida” gi Konstitutsiyaviy qonun loyihasining mazmun-mohiyatiga bagʻishlangan turli davra suhbatlari, uchrashuvlar, targʻibot tadbirlari tashkil qilinmoqda.

Xudda shunday tadbirlarining navbatdagisi Samarqand tuman kengashi tashabbusi bilan “Xaymari Poyon” mahalla fuqarolari yigʻini hududida joylashgan 12- son umumtaʼlim maktabida, ochiq osmon ostida tashkil qilindi.

“Konstitutsiya — baxtimiz qomusi” deb nomlangan tadbirda “Adolat” sotsial demokratik partiyasi Samarqand tuman Kengashi raisi Zuhra Quddusova, partiya faollari Xalq deputatlari Samarqand tuman Kengashi deputati Noila Muxitdinova, mahalla faollari, maktab oʻquvchilari hamda keng aholi vakillari ishtirok etdi.

Uchrashuvda soʻz olgan partiya vakillari bugun barcha saʼy-harakatlar inson qadrini yuksaltirishga qaratilgani, Bosh qomusimizga kiritiladigan jamiki oʻzgarishlarning negizida ham Oʻzbekistonda kechayotgan islohotlar mohiyatini belgilovchi “Inson qadri uchun” ulugʻvor gʻoyasi yotganini alohida taʼkidlashdi. Konstitutsiyaviy oʻzgarishlarning asl mohiyati ham shu aslida. Chunki xalqimiz hozirgi tarixiy islohotlarning mazmun-mohiyatini toʻla anglab yetmoqda. Xalq fikrini oʻrganish asosida mamlakat konstitutsiyasini takomillashtirish yurtimizda amalga oshirilayotgan islohotlarni yangi sifat darajasiga koʻtarish, xalqimiz turmush farovonligini yanada oshirish, Oʻzbekistonning dunyodagi eng ilgʻor davlatlari qatoriga kirishiga ulkan imkoniyatlar yaratadi.

Shu oʻrinda taʼkidlash joizki, ushbu oʻzgarishlarning aksariyati tadbirkorlar, fermerlar uzoq kutgan, mulkdorlar qatlami uchun nihoyatda muhim ahamiyatga ega. Masalan, loyihada davlatning bozor munosabatlarini rivojlantirish, qulay investitsiyaviy va ishbilarmonlik muhitini taʼminlash, halol raqobat uchun shart-sharoitlar yaratishi boʻyicha majburiyatlari belgilanyapti. Shuningdek, barcha mulk shakllarining teng huquqliligi, tadbirkorlarning qonunchilikka muvofiq har qanday faoliyatni mustaqil tanlashi va amalga oshirishga haqli ekanligi kafolatlanishi katta ahamiyatga molik. Mol-mulk, uy-joy daxlsizligi masalasini Bosh qomusimizda belgilash – partiya aʼzolari va elektorati uchun ayni muddao boʻlyapti. Mol-mulk daxlsizligining yuksak darajada kafolatlanishi ishbilarmonlik va investitsiyaviy faollikni ham ragʻbatlantiradi. Shu bois, uni hech ikkilanmasdan xalq Konstitutsiyasi deyish mumkin.

Tadbirda deputatlar, partiya faollari, faxriylar, yoshlar ham soʻzga chiqib, xalqimiz taqdiri va ertangi kunini belgilab beradigan tarixiy qonunga befarq boʻlmasdan, 30-aprelda boʻlib oʻtadigan referendumda faol ishtirok etishga chaqirishdi. Tadbir konsert dasturiga ulandi, maktab oʻquvchilarining chiqishlari va kuy-qoʻshiqlari tadbir qatnashchilariga zavq ulashdi.

Ochiq osmon ostidagi targʻibot tadbirlari respublikamiz boʻylab davom etmoqda.

Sanobar Mirsaidova,
Xalq deputatlari Samarqand viloyat Kengashi deputati.