“Konstitutsiya bilimdoni”

Partiyaning “Vatan kelajagi yoshlar qoʻlida” loyihasi doirasida partiya Shoʻrchi tuman Kengashi tomonidan tumandagi 2-sonli kasb-hunar maktabida “Konstitutsiya bilimdoni” koʻrik tanlovi boʻlib oʻtdi. Tanlovni oʻtkazish jarayonida partiya vakillari, deputatlar, tumandagi 2-umumiy oʻrta taʼlim maktabi jamoasi, tuman maktablarining ishtirokchi yuqori sinf oʻquvchilari ishtirok etishdi.

Tadbir avvalida soʻzga chiqqanlar navqiron avlodni har jihatdan sogʻlom va barkamol insonlar etib tarbiyalash, ularning siyosiy-huquqiy madaniyati, ijtimoiy faolligini oshirishga alohida eʼtibor qaratilayotganini taʼkidladilar.

Qizgʻin va murosasiz oʻtgan tanlov davomida bir-biridan kuchli va bilimdon oʻquvchi yoshlar oʻzaro bellashishdi.

Yakunga koʻra, tumandagi 2-sonli kasb-hunar maktabining 11- sinf oʻquvchisi Bahrom Choriyev birinchi oʻrinni egallab, viloyat bosqichiga yoʻllanma oldi.

Oʻrol Sherxanov, Xalq deputatlari Shoʻrchi tuman Kengashi deputati:

-Oʻzbekiston Respublikasining yangi tahrirdagi Konstitutsiyasiga bagʻishlab oʻtkazilgan mazkur tanlovdan koʻzlangan maqsad Bosh qomusimizning mazmun-mohiyatini keng targʻib etish orqali yoshlarning siyosiy-huquqiy bilimini oshirish, ijtimoiy-siyosiy jarayonlarda faolligini taʼminlashdan iboratdir. Tanlovning test, savol-javob shartlarida ishtirokchilar Konstitutsiyamizning hayotimizdagi oʻrni va ahamiyatiga doir bilim va tushunchalarini sinovdan oʻtkazdi.

Shuningdek, partiya Bandixon tuman Kengashi tomonidan ham tuman Agrotexnologiyalar texnikumida “Konstitutsiya bilimdoni” koʻrik tanlovi boʻlib oʻtdi.

Tanlovda tumandagi 15 nafarga yaqin yoshlar 3 ta shart boʻyicha oʻzaro kuch sinashdilar. Qizgʻin bahs-munozaralar ostida oʻtgan bellashuv natijalariga koʻra mazkur texnikum talabalaridan 1-oʻrinni 2-kurs talabasi Dilrabo Oʻrolova, 2-oʻrin 3-kurs talabasi Aziza Koʻcharova, 3-oʻrin esa 3-kurs talabasi Dilnoza Shaymardonovalarga nasib etdi.

Gʻoliblar “Adolat” SDPning qimmatbaho sovgʻalari va diplomlar bilan taqdirlandi.

Faxriddin Orifxonov,

“Adolat” SDP Surxondaryo viloyat Kengashi,

mafkuraviy ishlar boʻyicha rais oʻrinbosari.