Konstitutsiyaning yangi loyihasi xalqimizning ertangi farovon hayoti uchun

Maʼlumki, Konstitutsiyaning yangi loyihasi xalqimizning ertangi farovon hayoti uchun mustahkam huquqiy asos boʻlish bilan birga uning mazmuniga “Inson qadri uchun” gʻoyasi chuqur singdirilib, amaliy hayotimizda bosh qadriyatga aylantirilmoqda.

Hech shubhasiz, Yangi Konstitutsiya loyihasi “Inson qadri uchun” shiori ostida kechayotgan islohotlarga juda ham hamohang boʻlib, partiyamiz elektoratining xohish-irodasini ifoda etadi, xalqimiz qalbidagi orzu-istaklarni roʻyobga chiqaradi.

Oʻzbekiston “Adolat” SDP Toshkent viloyat Kengashi tomonidan Nurafshon shahrida tashkil etilgan seminar ham Yangi Oʻzbekistonning yangilanayotgan hayotbaxsh Asosiy Bosh qomusiga kiritilayotgan oʻzgartirishlar mazmun-mohiyatini targʻib qilish maqsadida oʻtkazildi.

Unda Toshkent iqtisodiyot universiteti professori Ismoil Saifnazarov, partiya viloyat Kengashi raisi Farmon Allayev, partiyaning shahar va tuman Kengashi raislari hamda OAV vakillari ishtirok etishdi.

Tadbirda soʻz olganlar bugun partiya tashkilotlari zimmasiga Konstitutsiyaviy islohotlar targʻibotini amalga oshirishda Yangi Oʻzbekistonning yangi Konstitutsiyasini yaratish yoʻlidagi hayotbaxsh qadamlarni birgalikda bosib oʻtishdek, masʼuliyatli vazifa yuklanayotganini alohida taʼkidlashdi.

“Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni yangi tahrirdagi loyihasi yuzasidan atroflicha maʼlumot va tushuntirishlar berib oʻtishdi.

Toshkent viloyatining barcha hududlari (tuman va shaharlari)da boʻlajak Referendumga tayyorgarlik ishlarini qizgʻin boshlab yuborilgani xususida toʻxtalisharkan, partiya tashkilotlari jonajon Oʻzbekistonimiz tarixi, qolaversa, xalqimiz hayotida muhim ahamiyat kasb etuvchi mazkur siyosiy jarayonga puxta hozirlik koʻrishganini bildirishdi.

“Adolat” SDP Toshkent viloyati Kengashi
matbuot xizmati.