Konstitutsiyaviy islohot-bugunning talabi

Ayni kunlarda Oʻzbekiston “Adolat” SDP Surxondaryo viloyat Kengashi faollari 30 aprel kuni boʻlib oʻtadigan “Oʻzbekiston Respublikasi Konstitutsiyasi toʻgʻrisida”gi konstitutsiyaviy qonun loyihasi yuzasidan hududlarda tashviqot tadbirlarini tashkil etib, Bosh qomusimizga kiritilayotgan xalqchil oʻzgarishlarning mazmun-mohiyatini tushuntirib berishda jonbozlik koʻrsatmoqda. Shunday tadbirlardan biri partiya Jarqoʻrgʻon tuman Kengashi va deputatlar tomonidan “Surxon sohili” mahallasida tashkil etildi. Uchrashuvda soʻz olganlar Bosh qomusimizga kiritilayotgan oʻzgartishlarning mazmun-mohiyati, uning inson huquqlarini himoya qilishga doir muhim jihatlari xususida maʼlumotlar berdi.

Maʼruzachilar yangilanayotgan Konstitutsiyada inson huquq va erkinliklarini taʼminlash – davlatning oliy majburiyati etib belgilanayotganligini aytib oʻtishdi. Shuningdek, inson va davlat organlari oʻrtasidagi yuzaga keladigan noaniqliklar inson foydasiga talqin qilinishi, huquqiy taʼsir choralari qonuniy maqsadga erishish uchun yetarli va mutanosib boʻlishi kerakligi belgilanayotganligini taʼkidlashdi.

Azamat Mamataliyev, Xalq deputatlari Jarqoʻrgʻon tuman Kengashi deputati:

- Ushbu qoidalar inson huquqlari ustuvorligini taʼminlaydi, davlat idoralarining oʻz vazifalarini inson huquqlariga rioya qilgan holda amalga oshirishda masʼuliyatini oshiradi hamda insonga meʼyoridan ortiq huquqiy taʼsir choralari qoʻllanilishining oldini oladi.Konstitutsiyada insonning shaxsiy huquqlari va erkinliklari kafolati eng ilgʻor xalqaro standartlarga muvofiq kuchaytirilmoqda. Xususan, shaxsni sud qarorisiz 48 soatdan ortiq muddat ushlab turilishi mumkin emasligi, ushbu muddat ushlab turish qonuniyligi va asosliligi sudda isbotlanmasa, shaxs darhol ozod qilinishi (“Xabeas korpus” instituti) hamda shaxsni ushlab turish chogʻida uning huquqlari va ushlab turilishi asoslari unga tushunarli tilda tushuntirilishi kerakligi (“Miranda qoidalari”), shuningdek, ayblanuvchi va sudlanuvchilarga oʻziga qarshi koʻrsatma bermaslik, yaʼni “sukut saqlash” huquqi belgilanmoqda. Ushbu qoidalar shaxsiy erkinlik daxlsizligini va insonlarni noqonuniy hibsga olishga yoʻl qoʻymaslikni kafolatlaydi. Tadbir soʻnggida tashkilotchilar yigʻilganlarni referendumda faol ishtirok etishga chaqirishdi.

Qizlarshoy Rahmatova,

Xalq deputatlari Jarqoʻrgʻon tuman Kengashi deputati