Konstitutsiyaviy islohotlar – inson shaʼni va qadr-qimmati uchun

Oʻzbekiston “Adolat” sotsial-demokratik partiyasining Konstitutsiyaviy qonun loyihasi mazmun-mohiyatini keng aholi qatlamlari orasida targʻib qilishga bagʻishlangan “Konstitutsiyaviy islohotlar – inson shaʼni va qadr-qimmati uchun” shiori ostidagi yirik targʻibot tadbiri Boʻka tumani Boʻston mahallasida bayramona va koʻtarinki ruhda oʻtdi.

Ochiq osmon ostida oʻtgan tadbirda Senatning Mudofaa va xavfsizlik masalalari qoʻmitasi raisi Qutbiddin Burhonov, “Adolat” SDP Siyosiy Kengashi raisi oʻrinbosari Abdukamol Rahmonov, partiyaning Toshkent viloyati Kengashi raisi Farmon Allayev, Xalq deputatlari mahalliy Kengashlaridagi partiya deputatlari, turli soha vakillari, ilgʻor tadbirkorlar, ayollar va yoshlar, nuroniy va faxriylar, keng jamoatchilik vakillari ishtirok etishdi.

Tadbirda soʻz olgan Senatning Mudofaa va xavfsizlik masalalari qoʻmitasi raisi Qutbiddin Burhonov va boshqalar, yangilanayotgan Konstitutsiya oʻz mazmun-mohiyati bilan Oʻzbekistonni yanada barqaror rivojlantirishga xizmat qilishini taʼkidlashdi.

Yangilanayotgan Konstitutsiyaning asl mazmun-mohiyati Oʻzbekistonni yanada barqaror rivojlantirish, turli tahdidlarga qarshi tura oladigan salohiyatini mustahkamlashga qaratilgani haqida soʻzlashdi. Konstitutsiyaviy islohotni fuqarolarimiz fikri va qoʻllab-quvvatlashi asosida, referendum orqali amalga oshirilishi xalqimiz xohish-irodasining ifodasi – haqiqiy xalq Konstitutsiyasi boʻlishiga puxta zamin yaratganini qayd etishdi.

Mamlakatimizda yangilanayotgan Konstitutsiya bevosita xalq tomonidan qabul qilinadigan birinchi huquqiy hujjat ekanini soʻzlasharkan, Referendumdagi har bir ovoz katta ahamiyat va yuridik kuchga ega boʻlishini alohida eʼtibor qaratishdi.

Asosiy Qomusimizning 65 foizga yangilanganligining jamiyatimiz taraqqiyoti bilan bevosita bogʻliqligi, mamlakatimizda keyingi yillarda roʻy berayotgan tub oʻzgarishlar, davlat boshqaruvining takomillashgani, kishilarimiz dunyoqarashining oʻzgargani, inson huquq va manfaatlarining davlat siyosati darajasiga koʻtarilgani bosh Qomusimizni qayta koʻrib chiqishni va uni davr talablari darajasida takomillashtirishni taqozo etgani xususida fikr yuritishdi.

Ularning fikricha, Yangi tahrirdagi Konstitutsiyada Oʻzbekiston – suveren, demokratik, huquqiy, ijtimoiy va dunyoviy davlat ekanligi qatʼiy belgilab qoʻyilmoqda, bu normalar sotsial-demokratik normalar boʻlib, inson huquqlariga oliy maqom beradigan, ularning ijtimoiy himoya qiladigan va qonun oldida barchaning tengligini taʼminlaydigan huquqiy mexanizm boʻlib xizmat qiladi.

Tadbirda ishtirok etganlar yangi tahrirdagi Konstitutsiyada belgilanayotgan xalqchil normalar va shu munosabat bilan joriy yilning 30-aprel kuni oʻtkazilishi rejalashtirilgan umumxalq referendumi yuzasidan batafsil maʼlumot berishdi.

Barchani xalqimiz taqdiri va ertangi kunini belgilab beradigan muhim kun – umumxalq referendumida Konstitutsiyaviy Qonun loyihasini qoʻllab-quvvatlab, el-yurt taqdiriga befarq boʻlmasdan, faol ishtirok etishga chorlashdi.

Bayramona ruhda tashkil etilgan tadbir mahalliy sanʼatkorlar tomonidan ijro etilgan kuy-qoʻshiq va jozibali raqslarga ulanib ketdi.