Kuz-qish mavsumiga tayyorgarlik holati oʻrganilmoqda

Oliy Majlis Qonunchilik palatasidagi “Adolat” SDP fraksiyasi tomonidan, hududlardagi mahalliy Kengash deputatlarini jalb qilgan holda umumtaʼlim maktablarining kuz-qish mavsumiga va yangi oʻquv yiliga tayyorgarlik ishlarini oʻrganib chiqish belgilangan.

Ushbu masala boʻyicha Qoraqalpogʻiston Respublikasining barcha shahar va tumanlarida deputatlar ishtirokida ishchi guruhlar tuzilib, tuman va shaharlardagi umumtaʼlim maktablaridagi haqiqiy holatni oʻrganmoqda. Jumladan, Qonlikoʻl tumanidagi deputat E.Baltabayeva boshchiligidagi ishchi guruh tumandagi 1-sonli maktabda boʻlib, u yerdagi 2023-2024 kuz-qish mavsumiga tayyorgarlik ishlarining borishi bilan tanishdi.

Maktabda 513 oʻquvchi taʼlim olmoqda. Mavsumga hozirlik doirasida taʼlim dargohining oʻquv xonalarini isitish uchun qozonxonalar toʻliq taʼmirlanib, texnik koʻrikdan oʻtkazilgan.

Deputatlar Qoʻngʻirot, Shoʻmanoy Taxtakoʻpir tumanlarida ham oʻrganish ishlarini olib borib, maktablarda kuz-qish mavsumiga tayyorgarlik ishlarini koʻzdan kechirib, kommunal xizmatlar bilan bogʻliq muammo va takliflarni eshitib, kamchiliklarni bartaraf etish boʻyicha deputatlik nazorati oʻrnatmoqda.

“Adolat” SDP Qoraqalpogʻiston Respublikasi kengashi

Matbuot xizmati.