Kuzatuvchi ochiqlikni taʼminlaydi

Joriy yilning 30-aprelʼ kuni oʻtkaziladigan referendumda ochiqlik va shaffoflikni taʼminlashda saylov uchastkalarida faoliyat olib boruvchi kuzatuvchilar zimmasiga katta masʼuliyat yuklatiladi. Chunki amaldagi qonunchilikka koʻra ular saylov jarayonida ovoz berishni toʻgʻri tashkil etilishidan tortib ovoz berish jarayonlari tugaganidan soʻng ovozlarni sanab chiqishda va uchastka komissiyasining ovoz berish yakunlari toʻgʻrisidagi bayonnomasini tuzishda qatnashadilar.

Yuqoridagilardan koʻrinib turibdi, kuzatuvchi shunga munosib boʻlishi lozim. Ayni shu maqsadda “Adolat” SDP Andijon viloyat kengashi tomonidan Xoʻjaobod va Buloqboshi tumanlaridagi saylov uchastkalariga biriktirilgan kuzatuvchilar uchun siyosiy oʻquv tashkil etildi.

Dastlab amaldagi saylov qonunchiligi, fuqarolarning saylovchi sifatida huquqlari, siyosiy partiya vakillarining jarayonda ishtiroki xususida ishtirokchilarga tushuncha berildi. Oʻz oʻrnida kuzatuvchi instituti zimmasidagi vazifalarga eʼtibor qaratildi.

Maloxatxon Musayeva, “Adolat” SDP Andijon viloyat kengashi raisi oʻrinbosari:

-Referendumda kuzatuvchining faolligi katta ahamiyatga ega. Qonunchiligimizda kuzatuvchilarning vakolatlari bilan bir vaqtda ular uchun man etiladigan holatlar ham belgilab qoʻyilgan. Jumladan, ovoz beruvchi ovoz berish byulleteniga oʻz belgisini qoʻyayotgan paytda ovoz berish kabinasi yoki xonasida boʻlishi, ovoz beruvchilarga taʼsir oʻtkazishi, biron-bir tashviqot materiali yoki adabiyoti tarqatishi mumkin emas. Qolaversa, ovoz beruvchilardan ular qanday ovoz berganliklarini surishtirish yoki ularga ovoz berish byulleteniga belgi qoʻyishda biron-bir tarzda yordam koʻrsatish man etiladi.

Referendum kuni adolatli jamiyat uchun ovoz beriladi. Shunday ekan bu siyosiy jarayonda barcha qonun asosida faol qatnashishi lozim.

“Adolat” SDP Andijon viloyat kengashi
Matbuot xizmati.