Kuzatuvchi shaffoflik va ochiqlikni taʼminlaydi

Joriy yilning 30-aprel kuni respublikamizda boʻlib oʻtadigan Konstitutsiyaviy qonun loyihasi boʻyicha referendumga oz vaqt qolmoqda. Siyosiy voqelikka tayyorgarlik qizgʻin. Jumladan, saylov uchastkalarida referendum kuni faoliyat olib boruvchi kuzatuvchilarning bilimlari oshirilmoqda.

“Adolat” SDP Andijon viloyat kengashi tomonidan Jalaquduq tumanida kuzatuvchilar uchun tashkil etilgan siyosiy oʻquv mashgʻulotida referendum kuni shaffoflik va ochiqlikni taʼminlashda kuzatuvchi institutining roli haqida soʻz yuritildi. Oliy Majlis Qonunchilik palatasi deputati Oltinoy Mamirova, partiya faollari va huquqshunoslar referendumga tayyorgarlik ishlari, fuqarolarning huquqlari va kuzatuvchilarning ishtiroki haqida tushuncha berdilar.

Oltinoy Mamirova, OMQP deputati:

-Amaldagi qonunchilikdan kelib chiqib referendum kuni ovoz berish joylarida va ovozlarni sanab chiqishda siyosiy partiyalarning vakili boʻlgan kuzatuvchilar va ommaviy axborot vositalarining vakillari qatnashish huquqiga ega. Bu boradagi tartiblar “Oʻzbekiston Respublikasining referendumi toʻgʻrisida”gi qonunda belgilab qoʻyilgan. Bugun kuzatuvchilarning huquqlari atroflicha tushuntirildi. Referendumga qadar ular okrug va uchastka komissiyalarining tayyorgarlik ishlarining borishini ham kuzatishlari mumkin. Shu sabab bu masʼuliyatli vazifaga munosib nomzodlar tanlab olindi.

Tadbir yakunida ovoz berish tartibi va saylovchilarning huquqlari yuzasidan ishtirokchilar oʻzlarini qiziqtirgan savollarga javob oldilar.

“Adolat” SDP Andijon viloyat kengashi
Matbuot xizmati.