Maʼmuriy islohotlar - samarali davlat boshqaruvi tizimini yaratishning muhim manbai

So‘ngi yillarda yurtimizda har bir jabhada samarali islohotlar amalga oshirilmoqda. Bu islohotlarning asosiysi, shubhasiz, mamlakat taraqqiyotini taʼminlovchi eng muhim omillardan biri davlat boshqaruvi bilan bog‘liq maʼmuriy islohotlardir.

Zero, insoniyatning ko‘p asrlik davlatchilik tajribasi shundan dalolat beradiki, davlat boshqaruvi tizimidagi muammolar nafaqat ijtimoiy-siyosiy keskinlik ortishining balki, tashqi tahdidlar uchun qo‘lay imkoniyat hamda milliy manfaatlarni himoya qilish tizimini zaiflashturivchi omil sifatida ham xizmat qilishi mumkin.

Davlatimiz rahbari tomonidan O‘zbekiston Respublikasi Oliy Majlisi va xalqiga yo‘llagan murojaatnomasida ham ixcham va samarali davlat boshqaruv tizimiga o‘tishni taklif qilinishi, oldinlari eʼtibordan chetda qolib, “yo‘q bo‘lib ketish” arafasida bo‘lgan sohalarni “oyoqqa turg‘izish” uchun olti yil davomida yangi vazirlik va idoralarni tashkil qilishga to‘g‘ri kelganligi, shunday qilishga majbur ekanligimiz, aks holda hozirgi yutuqlarimizga aslo erisha olmasligimizni taʼkidlangan edi.

Mamlakatimizda maʼmuriy islohotlarning yangi bosqichi 2017-2021 yillarga mo‘ljallangan O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi qabul qilinishi bilan bog‘liq. Uning qabul qilinishi va amalga oshirilishi davlat boshqaruv tizimini isloh qilish davlat va jamiyat qurilishi tizimini takomillashtirish, mamlakatni modernizatsiya qilish va barcha sohalarani liberallashtirishga qaratilgan keng miqyosli o‘zgarishlarni yangi bosqichini boshlab berdi.

Keyinchalik qabul qilingan O‘zbekiston Respublikasida Maʼmuriy islohotlar konsepsiyasi Harakatlar strategiyasini amalga oshirishda muhim qadam bo‘ldi va mohiyatiga ko‘ra, O‘zbekistonning davlat va jamiyat qurilishida yangi sahifani ochib berdi. Mazkur konsepsiyada davlat boshqaruvi tizimini tubdan isloh qilishning oltita asosiy yo‘nalishi belgilab berildi.

Biroq maʼmuriy islohotlarni izchil davom ettirish yo‘lida o‘z yechimini kutayotgan masalalarni to‘liq hal etishga hamon ehtiyoj mavjud edi. Shundan kelib chiqqan holda, davlat boshqaruvi tizimining samaradorligini oshirish, ular faoliyatini natijadorlikka yo‘naltirish orqali aholi farovonligini taʼminlash va “mobil boshqaruv apparati”ni yaratish

 maqsadida Prezidentimizning “2022 — 2023 yillarga mo‘ljallangan Yangi O‘zbekiston maʼmuriy islohotlari dasturini ishlab chiqish bo‘yicha tashkiliy chora-tadbirlar to‘g‘risida”gi farmoyishi qabul qilindi.

Mazkur farmoyishga muvofiq, 2022 — 2023 yillarga mo‘ljallangan Yangi O‘zbekiston maʼmuriy islohotlari dasturini ishlab chiqishni muvofiqlashtiruvchi respublika komissiyasi va tegishli ishchi guruhlar tomonidan maʼmuriy islohotlarni amalga oshirishda davlat boshqaruvi organlarining faoliyati o‘zaro kelishilgan tarzda, samarali olib borilishini, sustkashliklar va masʼuliyatsizlikka yo‘l qo‘ymasligini taʼminlashga qaratilgan chora-tadbirlar ishlab chiqildi.

Prezidentimizning 2022 yil 21 dekabrdagi “Yangi O‘zbekiston maʼmuriy islohotlarini amalga oshirish chora-tadbirlari to‘g‘risida”gi Farmoniga ko‘ra, 2023 yil 1 yanvardan boshlab mustaqil faoliyat yurituvchi respublika ijro etuvchi hokimiyat organlarining sonini 61 tadan 28 tagacha, shu jumladan, vazirliklar sonini 25 tadan 21 tagacha qisqartirish belgilandi.

Darhaqiqat, davlat boshqaruvining markazlashib ketishi vazirlik va idoralar vakolatlarining bir-birini takrorlashi, agentliklarning haddan tashqari ko‘payib ketishi, ortiqcha byurokratiyaning kuchayishiga sabab bo‘layotgan edi.

Qolaversa, Vazirlar Mahkamasi ijro etuvchi tuzilmasi isloh qilinib, Bosh vazirning 4 nafargacha o‘rinbosarlari lavozimi hamda Bosh vazir kotibiyati tashkil etildi. Bu, o‘z navbatida, zamonaviy talablarga javob beradigan ixcham davlat boshqaruvi tizimini shakllantirish, qaror qabul qilish va masalani ko‘rib chiqish jarayonlarini soddalashtirishga xizmat qiladi.

Umuman olganda, respublika ijro etuvchi hokimiyat organlari faoliyati yangilangan talablar va tamoyillar asosida tashkil etilayotganligi maʼmuriy islohotlar doirasida mamlakatimizda natijadorlikka yo‘naltirilgan ixcham va professional davlat boshqaruvi tizimini yaratish bo‘yicha chora-tadbirlarning o‘z vaqtida va samarali amalga oshirilayotganligini anglatadi.

Orif SHUKUROV,

“Adolat” SDP Jizzax viloyat Kengashi raisi,

Xalq deputatlari Jizzax viloyat Kengashi deputati