Mahalla fuqarolariga har bir soha islohotlari yetkazildi

Konstitutsiyaviy qonun loyihasining mazmun-mohiyatiga bagʻishlangan navbatdagi targʻibot tadbiri Oliy Majlis Qonunchilik palatasi deputati Muzaffara Abdiyeva tomonidan Pastdargʻom tumani, “Buston” va “A.Temur” mahallalarining aholisi bilan Pastdargʻom tuman Davlat xizmatlari binosida tashkil etildi. Soʻzga chiqqanlar taʼkidlashganidek, Asosiy qonunda fuqarolarning bepul boshlangʻich kasb-hunarga oʻqitilishi ham belgilanmoqda. Nogironligi bor bolajonlarimizga oʻz tengdoshlari bilan bir xil taʼlim olishi uchun barcha sharoitlarni yaratish koʻzda tutilyapti. Shuning uchun, bunday imkoniyatlar inklyuziv taʼlim sifatida Konstitutsiyaga kiritilmoqda. Bu shunday nuqsonlarga ega bolalarimizning yakkalanib qolmasligi, jamiyatning toʻlaqonli aʼzosi sifatida shakllanishi va kamol topishi uchun muhim kafolatdir.

Bundan tashqari Konstitutsiyada davlatning oʻqituvchilar shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qilish majburiyati kuchaytirilmoqda. Mahallalarda, ularda istiqomat qiluvchi har bir fuqaro va kam taʼminlangan oilalar jumladan temir daftarga kiritilganlar, nogironligi boʻlgan fuqarolar hamda ishsiz xotin-qizlar masalalariga ham alohida toʻxtalib oʻtishdi.

Muloqot soʻnggida deputat Muzaffara Abdiyeva barchani xalqimiz taqdiri va ertangi kunini belgilab beradigan tarixiy qonunga befarq boʻlmasdan, 30-aprelda boʻlib oʻtadigan referendumda faol ishtirok etishga chaqirib qoldi.

Xonbuvi Xaitova,

“Adolat”SDP Pastdargʻom tuman Kengashi raisi.