Mahallada siyosiy oʻquv

Aholining siyosiy-huquqiy madaniyatini oshirish, mamlakatimizda olib borilayotgan xalqchil siyosat, qabul qilinayotgan qaror va qonunlarning mazmun-mohiyatini oddiy fuqarolarga yetkazish maqsadida Oʻzbekiston “Adolat” SDP tomonidan siyosiy oʻquvlar oʻtkazilib kelinyapti. Shu maqsadda partiya tizimida koʻngilli lektorlar guruhlari tashkil etilgan boʻlib, ayni paytda ular shahar va tumanlardagi mahallalarda aholi oʻrtasida targʻibot tadbirlarini olib borishmoqda.

Surxondaryo viloyatining bir qator tumanlarida ham ushbu siyosiy oʻquvlarda partiya xodimlari, faollar, lektorlar hamda mahallalar aholisi ishtirok etishdi.

Siyosiy oʻquvlarda lektorlar, partiya xodimlari mamlakatimiz hayotidagi oʻzgarishlar, Prezidentimiz tomonidan qabul qilingan yangi farmon va qarorlarning mazmun-mohiyati hamda jahonda yuz bergan eng muhim yangiliklar haqida soʻz yuritishdi.

Xususan, Qumqoʻrgʻon tuman partiya kengashi tashabbusi bilan “Chuqurlisoy” mahalla fuqarolar yigʻinida ana shunday tadbirlardan biri tashkil etildi. Unda maʼruzachilar fuqarolarga davlatimiz rahbari tomonidan imzolangan qonun va boshqa hujjatlarning mazmuni, hayotiy ahamiyati xususida tushuncha berib oʻtdi. Fuqarolarning milliy qonunchiligimizdagi yangiliklardan xabardorligini taʼminlash ularning ijtimoiy-siyosiy faolligini oshirib, jamiyatda huquqiy madaniyatni yuksaltirishga qaratilgan amaliy ishlarning bir qismi sanaladi.    

Denov tumanidagi “Yangiobod” MFYda boʻlib oʻtgan siyosiy oʻquvda mavzuga doir maʼruzalarni tinglab, ishtirokchilar oʻz fikr-mulohazalarini bayon etishdi. Partiyamizning “Adolat” siyosiy-huquqiy oʻquvlar kuni!” loyihasi doirasidagi mazkur tadbir oʻzaro fikrlashuv tarzida oʻtganligi eʼtiborga molik.

Shuningdek, fuqarolar xalq taʼlimi sohasiga doir yangiliklar haqida oʻz fikrlari bilan oʻrtoqlashishdi. Umumtaʼlim maktablarida oʻquvchilarni yangi darsliklar, sinfxonalari bilan taʼminlash yuzasidan amalga oshirilgan ishlar, maktablarda zarur shart-sharoitlar haqidagi maʼlumotlar yigʻilganlarni qiziqtirganligi, ayniqsa, ota-onalarning ushbu dolzarb mavzuga munosabatini ifodaladi. Lektor va partiya xodimlari ishtirokchilarning shu mavzudagi savollariga batafsil javob qaytarishdi.

Mahallalarda tashkil etilayotgan bunday targʻibot tadbirlari fuqarolarning siyosiy bilimini yanada boyitishi barobarida partiya xodimlari hamda maʼruzachilarning ham faolligi oshishiga turtki boʻlmoqda. Ayniqsa, chekka qishloq hududlarida yashovchi har bir fuqaroni yangiliklardan xabardor etib borish zarurligini nazarda tutsak, bunday tadbirlarning ijtimoiy-siyosiy ahamiyati yanada yaqqol ayon boʻladi.

Dilafroʻz Rahmatova,

“Adolat” SDP Surxondaryo viloyat Kengashi mafkuraviy ishlar boʻyicha bosh mutaxassisi.