Mahallada siyosiy oʻquv oʻtkazildi    

Aholining siyosiy-huquqiy madaniyatini oshirish, mamlakatimizda olib borilayotgan xalqchil siyosat, qabul qilinayotgan qaror va qonunlarning mazmun-mohiyatini oddiy fuqarolarga yetkazish maqsadida respublikamiz hududlari boʻylab joylarda Oʻzbekiston “Adolat” SDP faollari tomonidan siyosiy oʻquvlar oʻtkazilib kelinyapti.

Bu borada partiya tizimida koʻngilli lektorlar guruhlari tashkil etilgan boʻlib, ayni paytda ular shahar va tumanlardagi mahallalarda aholi oʻrtasida targʻibot tadbirlarini olib borishmoqda.

Jumladan, Surxondaryo viloyatining bir qator tumanlarida ham ushbu siyosiy oʻquvlarda partiya xodimlari, faollar, lektorlar hamda mahallalar aholisi ishtirok etishdi.

Mazkur jarayonlarda partiya lektorlari hamda xodimlari mamlakatimiz hayotidagi oʻzgarishlar, Prezidentimiz tomonidan qabul qilingan yangi farmon va qarorlarning mazmun-mohiyati hamda jahonda yuz bergan eng muhim yangiliklar haqida soʻz yuritishdi.

Xususan, Qumqoʻrgʻon tuman partiya kengashi tashabbusi bilan “Chuqurlisoy” mahalla fuqarolar yigʻinida ana shunday tadbirlardan biri tashkil etildi. Unda maʼruzachilar fuqarolarga davlatimiz rahbari tomonidan imzolangan qonun va boshqa hujjatlarning mazmuni, hayotiy ahamiyati xususida tushuncha berib oʻtdi.  

Denov tumanidagi “Yangiobod” MFYda boʻlib oʻtgan siyosiy oʻquvda mavzuga doir maʼruzalarni tinglab, ishtirokchilar oʻz fikr-mulohazalarini bayon etishdi. Partiyamizning “Adolat” siyosiy-huquqiy oʻquvlar kuni!” loyihasi doirasidagi mazkur tadbir oʻzaro ochiq muloqot tarzida oʻtganligi eʼtiborga molik.

Shuningdek, jarayonda fuqarolar xalq taʼlimi sohasiga doir yangiliklar haqida oʻz fikrlari bilan oʻrtoqlashishdi. Umumtaʼlim maktablarida oʻquvchilarni yangi darsliklar, sinfxonalari bilan taʼminlash yuzasidan amalga oshirilgan ishlar, maktablarda zarur shart-sharoitlar haqidagi maʼlumotlar yigʻilganlarni qiziqtirganligi, ayniqsa, ota-onalarning ushbu dolzarb mavzuga munosabatini ifodaladi. Lektor va partiya xodimlari ishtirokchilarning savollariga batafsil javob berishdi.

Mahallalarda tashkil etilayotgan bunday targʻibot tadbirlari fuqarolarning siyosiy bilimini yanada boyitishi barobarida partiya xodimlari hamda maʼruzachilarning ham faolligi oshishiga turtki boʻlmoqda. Ayniqsa, chekka qishloq hududlarida yashovchi har bir fuqaroni yangiliklardan xabardor etib borish zarurligini nazarda tutsak, bunday tadbirlarning ijtimoiy-siyosiy ahamiyati yanada yaqqol ayon boʻladi.

Dilafroʻz Rahmatova,
Oʻzbekiston “Adolat” SDP Surxondaryo viloyat Kengashi
mafkuraviy ishlar boʻyicha bosh mutaxassisi