Mahalladagi suhbat mavzusi: referendum

Ayni kunlarda qaysi bir davraga kirmang suhbat mavzusi Konstitutsiyamizga kiritilayotgan oʻzgartishlarga borib qadaladi. Bu bejiz emas. Yangi tahrirdagi Konstitutsiyamizning 9-moddasida koʻrsatib oʻtilganidek, jamiyat va davlat hayotining eng muhim masalalari xalq muhokamasiga taqdim etiladi, umumxalq ovoziga – referendumga qoʻyiladi.

“Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni loyihasi bugun jamoatchilik tomonidan chuqur oʻrganilmoqda. Andijon tumanidagi Sadda tagi mahallasida Oliy Majlis Qonunchilik palatasi deputati Mavluda Adhamjonova ishtirokida oʻtkazilgan targʻibot tadbirida ham ayni shu mavzuda soʻz bordi. Fuqarolar Bosh Qonunimizga kiritilayotgan oʻzgartishlar bilan yaqindan tanishtirildi. Inson qadri va fuqarolarning huquqlari qonun asosida yanada mustahkamlanayotgani taʼkidlandi.

Mavluda Adhamjonova, OMQP deputati:
-Jamoatchilik birinchi navbatda qonun loyihasini yaratishda bevosita oʻzlari ishtirok etganliklaridan mamnun. Bu ularning huquqiy madaniyati yuksalganini ifodalaydi. Endilikda  davlat organlari va tashkilotlari, fuqarolarning oʻzini oʻzi boshqarish organlari, ularning mansabdor shaxslari zimmasidagi masʼuliyat yanada oshdi. Konstitutsiyamizda belgilab qoʻyilganidek,  ular   har kimga oʻz huquqlari hamda qonuniy manfaatlariga daxldor boʻlgan hujjatlar, qarorlar va boshqa materiallar bilan tanishish imkoniyatini taʼminlashi shart. Bu oʻz-oʻzidan fuqarolarni qonunchiligimizga boʻlgan ishonchini oshiradi.

Tadbirda soʻz olganlar Konstitutsiyamizning mazmun-mohiyati haqida oʻz fikrlarini bildirdilar. Xonadonlarga kirib borgan xalq vakili va MFY faollari  barchani referendumga befarq boʻlmaslikka chaqirdilar.

Zumradoy Soliyeva,
Oliy Majlis Qonunchilik palatasi deputati yordamchisi.