Mahallalar obodligi, unda istiqomat qilayotgan aholining farovonligi

Deputat – avvalambor, oʻziga ishonch bildirgan saylovchilar ishonchini qozona olishi kerak. U doimo xalq bilan hamnafas yashashi, el-yurt tashvishi uchun jonkuyar boʻlmogʻi lozim. Xalqning dardini eshitgan, teran anglagan, odamlarning tashvishlarini oʻz tashvishi deb bilgan deputat hech qachon elning nazaridan qolmaydi. Odamlar uni hurmat qilishadi, eʼzozlashadi.

Oʻzbekiston “Adolat” SDP xalq deputatlari Zangiota tumani Kengashi deputati Nigora Xalxodjayeva ana shunday faol xotin-qizlardan sanaladi. Chunki, u partiya viloyat kengashi tomonidan tashkil etilayotgan barcha tadbirlarda faol qatnashib, quyi boʻgʻinlar va deputatlik guruhlari ishni jonlantirish borasida amaliy takliflar bildiradi. Ayniqsa, saylovchilar tomonidan kelib tushgan murojaatlarni iloji boricha joyida hal etishga harakat qiladi.

Zangiota tumanining “Istiqlol” MFY ahli ham ancha yillardan beri yoʻllarning nosozligidan aziyat chekib kelayotgan edi. Deputat Nigora Xalxodjayeva bu muammoni bartaraf etishni oʻz zimmasiga oldi. Ayni kunda mahalla hududidagi “ Doʻstlik ” koʻchasining 2.5 km, “Yangi Xayot” koʻchasining 1 km, “Tutzor” koʻchasining 0,8 km, “Zarafshon” koʻchasining 2 kilometrlik ichki yoʻllarni joriy taʼmirlash, qum-shagʻal toʻkib tekislash ishlari jadallik bilan olib borilmoqda.

“Istiqlol” mahallasi ichki yoʻllarini tekislash, taʼmirlash ishlarini “Osiyo trans Peshko” MCHJ yoʻlsozlari amalga oshirmoqda. Belgilangan ishlarni amalga oshirish uchun korxonaning bir nechta ogʻir yuk koʻtaruvchi, yuklagich va yoʻl tekislash texnikalari safarbar etilgan. Bajarilayotgan ishlar sifati xalq vakillari nazoratiga olingan. Deputatning jonbozligi, harakatchanligi sababli muammo tez orada ijobiy yechim topadi.

Mahallalar obodligi, unda istiqomat qilayotgan aholining farovonligi, bir qancha omillarga bogʻliq. Ulardan biri manzillarni bir-biriga ulovchi ravon yoʻllarning mavjudligidir.

Oʻzbekiston “Adolat” SDP Toshkent viloyati Kengashi

Matbuot xizmati.