Maktab-ibrat maskani

Har qanday jamiyatning rivojlanishida taʼlim tizimi asosiy boʻgʻinlardan biri hisoblanadi. Xususan, mamlakatimizda soʻnggi yillarda taʼlim tizimiga alohida eʼtibor qaratilmoqda.

Taʼlim sohasida amalga oshirilayotgan islohotlarning asosiy qismini, albatta, maktab taʼlim tizimidagi islohotlar tashkil etadi. Xususan, bugungi kunda mamlakatimizda oʻziga xos muhim voqea sanalgan yangi tahrirdagi Konstitutsiyamizning 50-moddasida ham taʼlim tizimi, uning shakllari, turlari rivojlanishi, shuningdek, taʼlim muassasalarida alohida taʼlimga ehtiyojmand bolalar uchun inklyuziv taʼlim va tarbiya qonun bilan belgilab qoʻyilganligi ham buning yaqqol namunasidir.

Prezidentimiz taʼkidlaganidek: “Farzandlarimiz maktabdan qanchalik bilimli boʻlib chiqsa, yuqori texnologiyalarga asoslangan iqtisodiyot tarmoqlari shuncha tez rivojlanadi, koʻplab ijtimoiy muammolarni yechish imkoni tugʻiladi. Shunday ekan, Yangi Oʻzbekiston ostonasi maktabdan boshlanadi desam, oʻylaymanki, butun xalqimiz bu fikrni qoʻllab-quvvatlaydi”.

Darhaqiqat, davlatining rivojlanishi, xalqning farovon kelajagi oʻsib kelayotgan yosh avlodga beriladigan taʼlim va tarbiyaga chambarchas bogʻliq, albatta. Buni anglagan va oʻzining faoliyatini kelajak avlod ilmiga bagʻishlagan Respublikamiz maktab taʼlim dargohlariga nazar soladigan boʻlsak, soʻnggi yillarda yaratib berilayotgan shart-sharoitlarga javoban oʻquvchilarning aqlan, jismonan va ruhan rivojlanishi uchun maktablarda turli faoliyatlar olib borilib tinimsiz mehnat qilinmoqda.

Bunga misol tariqasida Samarqand viloyati Narpay tumani “Xalqobod” mahallasidagi 64-umumtaʼlim maktabida oʻquvchilarning sifatli taʼlim olishlari uchun bor kuch-gʻayrati bilan yosh avlodga taʼlim-tarbiya berib kelayotgan oʻqituvchilarni aytish mumkin.

Maktabda faoliyat olib borayotgan uslub birlashma aʼzolari oʻrtasida “Ijodkor oʻqituvchi” tanlovi oʻtkazilib kelinmoqda. Tanlovning navbatdagi ishtirokchisi tarix fani oʻqituvchisi Tolipova Marhabo va uning oʻquvchilari tomonidan “Oʻz farzandini sotishni maqsad qilgan ota-ona jinoyat sud ishi” boʻyicha odil sudlov jarayoni maktab oʻquv xonasida emas, balki Narpay tuman sudi binosida tashkil etilishi ishtirokchi va tomoshabin oʻquvchilarda katta qiziqish uygʻotdi.Qatnashuvchilar voqeani real hayotda sodir boʻlayotgandek tarzda koʻrsatishi ularning jarayonga toʻliqligicha kirib borganligi, oʻz rolini maromiga yetkazib ijro etganligi-bu oʻqituvchi va oʻquvchilarning yutugʻidir.

Kasb tanlashda toʻgʻri yoʻl koʻrsata olish-oʻquvchilarni aynan qiziqqan sohasi haqida toʻliqroq maʼlumotga ega boʻlishlari uchun xuddi shunday turli tashkilotlarga sayohatlar uyushtirish, mahorat darslarini aynan tashkilot binolarida tashkil etish, oʻzini kelajakda sohaning yetuk mutaxassisi boʻlib yetishishi uchun sahnalashtirilgan kadrlarda koʻra olishini sinab koʻrishga imkon yaratish faqat aʼlo natija berishiga aminman. Zero, maqsad qanchalik ulugʻ boʻlsa, mevasi shunchalik totli boʻladi.

Nasiba Rahmonova,

xalq deputatlari Narpay tuman Kengashi deputati,

64-umumtaʼlim maktabi oʻquv ishlari boʻyicha direktor oʻrinbosari.