Maktab oʻquvchilarini kasb-hunarga oʻqitish uchun taʼlim muassasalari tayyormi?

Oʻzbekiston Respublikasi Prezidenti Shavkat Mirziyoyevning “2022–2026-yillarga moʻljallangan yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida”dagi farmonidan kelib chiqib, Pastdargʻom tumanida ham dastur ishlab chiqilgan. Unda kasbiy taʼlim va kasbga oʻqitish sifatini taʼminlash tizimi talablariga toʻliq javob beradigan namunaviy professional taʼlim muassasalari faoliyatini yoʻlga qoʻyish belgilangan.

Unga koʻra, tumandagi 21, 56, 111-umumtaʼlim maktablari tajriba sinov tariqasida kasb-hunarga oʻqitish boʻyicha 4 ta yoʻnalish va bitta qoʻshimcha xorijiy tilni oʻqitish belgilangan. Ushbu oʻquv kurslari joriy yilning sentyabr oyidan faoliyatini boshlashi rejalashtirilgan.

Xalq deputatlari Pastdargʻom tuman kengashi tomonidan tashkil etilgan ishchi guruh yuqorida roʻyxati keltirilgan maktablarda kasb-hunarga oʻqitish va til oʻrgatish boʻyicha oʻquv va amaliyot xonalarining jihozlangani, oʻquvchilar uchun yaratilgan sharoitlarni oʻrgandi.

Oʻrganish natijalari Xalq deputatlari Pastdargʻom tuman Kengashining “Taʼlim, sogʻliqni saqlash, madaniyat, sport va ijtimoiy himoya masalalari boʻyicha doimiy komissiyasi” tomonidan muhokama qilindi. Muhokama davomida oʻrganilgan maktablarda oʻquvchilarni kasb-hunarga oʻqitish boʻyicha xonalar ajratilib, zarur jihozlar bilan taʼminlanganligi taʼkidlandi. Aniqlangan ayrim kamchiliklar boʻyicha esa tegishliligi boʻyicha masʼullarga xulosalar berilib, bartaraf etish choralarini koʻrish belgilab olindi.

Gulfinso Quchqarova,

Xalq deputatlari Pastdargʻom tuman Kengashi deputati.