Mamlakat barqaror rivojlanish yoʻlida dadil qadamlar

Jamiyatning bebaho boyligi boʻlgan inson salomatligini mustahkamlash, yurtimizda tibbiy xizmat sifatini oshirish bilan bogʻliq masalalar hamisha davlatimiz rahbariyatining diqqat markazida boʻlib kelmoqda. Kuni kecha Prezidentimizning farmon bilan tasdiqlangan “Oʻzbekiston – 2030” strategiyasida ham xalq salomatligi asrash, sogʻliqni saqlash masalasi dastlabki boʻgʻinlarda qayd etilgan. Darhaqiqat Prezidentimiz bot-bot taʼkidlaganlaridek sogʻliqni saqlash masalasi har bir odamning kundalik hayotiga toʻgʻridan-toʻgʻri daxldor. Bu boradagi muammolar aholining salomatligiga, oxir-oqibatda jamiyatimizning ijtimoiy kayfiyatiga, xalqning davlatga, hukumatga boʻlgan ishonchiga, hech shubhasiz, eng kuchli taʼsir koʻrsatadigan soha. Shuning uchun ham mana shu oʻta muhim, hal qiluvchi sohadagi masalani yechmasdan turib, boshqa soha va tarmoqlarda olib borilayotgan islohotlarning muvaffaqiyati haqida gapirish mumkin emas.

Ushbu hujjat bilan dastlab Toshkent shahrining tibbiyot muassasalarida keyinchalik butun Respublika miqyosida davlat tomonidan kafolatlangan bepul tibbiy xizmatlar hajmi va dori vositalari roʻyxatini amaliyotga kiritishni nazarda tutuvchi davlat tibbiy sugʻurtasi mexanizmlari bosqichma-bosqich joriy etilishi belgilangan. Biz Adolatchilar uchun quvonarli jihati partiya Dasturida tibbiyot sohasi boʻyicha ilgari surilayotgan maqsad va vazifalari ham ushbu muhim hujjatda oʻz aksini topgan. Eng asosiysi ushbu tizim orqali kasalliklarning oldini olish, ularni erta aniqlash, tibbiy yordam koʻrsatishning birlamchi boʻgʻinida malakali va sifatli xizmatlar koʻrsatilishini yoʻlga qoʻyish, aholining salomatlik darajasi, oʻrtacha umr koʻrish davomiyligini oshirish, bemor yoʻllanmasi, kasalligi, qaysi shifokor tomonidan koʻrilgani, tashxis va davolanish holatlari va shu kabi axborotlar almashinuvi taʼminlanib tibbiyot xodimlari va bemorlar uchun kerakli maʼlumotlarni olish imkoniyati yaratiladi.

Shuningdek, ogʻir ijtimoiy ahvolga tushib qolgan xotin-qizlarni qayta kasbga tayyorlash xarajatlarini davlat tomonidan qoplab berilishini yoʻlga qoʻyilishi uzoqni oʻylab qoʻyilgan qadam deb oʻylayman. Chunki, qachonki ayol xotirjam boʻlsa, ayol bugungi kunidan kungi tinch, ertangi kunidan xavotiri boʻlmasa oila tinch, jamiyat rivoji oldinga qarab ketaveradi. Agar ayol alamzada boʻlsa oilada ham jamiyatda ham notinchlik yuzaga kelaveradi, jinoyatchiliklar soni ortib boraveradi. Shu boisdan ham ushbu muhim qadamning qoʻyilishi ogʻir ijtimoiy ahvolga tushib qolgan xotin-qizlarning jamiyatda oʻz oʻrnini topa olishiga, ertangi kuniga ishonch va umid bilan boqishiga xizmat qiladi.

Bir soʻz bilan aytganda, jamiyat rivoji yoʻlida bildirilgan har bir taklifni eʼtibordan chetda qoldirmay, har bir soha faoliyatini mukammal tahlil qilib qoʻyilgan ushbu qadamlar mamlakatning barqaror rivojlanish yoʻlidan borayotganidan darak beradi.

Tozagul Xoliqova,

Xalq deputatlari Samarqand viloyat Kengashi deputati.