Mamlakatimiz soliq siyosatida qanday oʻzgarishlar yuz bermoqda?

Maʼlumki, qonun ustuvorligini taʼminlash demokratik huquqiy davlat barpo etishning bosh mezoni hisoblanadi. Shu bois, mustaqillikning ilk davrlaridan buyon mamlakatimizda mazkur masalaga davlatning muhim siyosati darajasida qarab kelinmoqda. Sir emaski, yurtimizda amalga oshirilayotgan keng koʻlamli islohotlarning samarasi qonun ustuvorligini taʼminlash bilan bevosita bogʻliqdir.

Ayni masalaning ajralmas bir qismi hisoblangan davlatimizning soliq siyosati yildan yilga takomillashib bormoqda. Jumladan, bugungi kunda Soliq kodeksiga bir qator yangilanishlar va oʻzgartirishlar kiritilgan boʻlib, joylarda partiyamiz faollari tomonidan yangilangan soliq imtiyozlari va boshqa soliq siyosatidagi oʻzgarishlar yuzasidan tadbirlar oʻtkazilmoqda.

Xususan, Oʻzbekiston “Adolat” SDP Termiz tuman Kengashi tashabbusi bilan tumandagi “Bunyodkor” MFYda joylashgan 4-umumtaʼlim maktabida “Soliq siyosatidagi yangi oʻzgarishlar” mavzusida seminar boʻlib oʻtdi. Tadbirda partiya tuman Kengashi xodimlari, deputatlar, viloyat Soliq boshqarmasi hamda tuman boʻlimi vakillari, Pensiya jamgʻarmasi Termiz tuman boʻlimi xodimlari, mahalla fuqarolari hamda BPT aʼzolari ishtirok etishdi.

Tadbirda soʻz olgan maʼruzachilar seminar ishtirokchilarini yangi qabul qilingan Soliq kodeksidagi tegishli boʻlim va moddalari bilan yaqindan tanishtirish bilan birga, Soliq tizimiga kiritilgan oʻzgarishlar va yangiliklarga batafsil toʻxtalib oʻtdi.

Soliq kodeksining yangi tahririda soliq qonunchiligining maksimal darajada soddalashtirilganligi, soliq toʻlovchilarning huquqlari va ularning qonuniy manfaatlarini himoya qilish kuchaytirilgani alohida taʼkidlandi. Shuningdek, soliq nazorati shakllari va mexanizmlari takomillashtirilib, zamonaviy axborot va kommunikatsiya texnologiyalarini keng joriy etish tartibi haqida tushuncha berildi.

Abdumannon Karimov, “Bunyodkor” MFY fuqarosi:

Bu kabi seminarlarni davomiy oʻtkazilishi siyosiy-huquqiy bilimlarimizni yanada mustahkamlanishiga yordam beradi. Seminarning yana bir afzalligi, shubhasiz, barcha filiallardan tashrif buyurgan vakillar bilan bevosita muloqot qilish imkoniyati yaratildi. Shuningdek, seminar davomida soliq sohasidagi qiziqarli va foydali mavzular xususida bilim va tushunchalarga ega boʻldik.

Ochiq muloqot, munozara va muhokamalar tarzida oʻtkazilgan seminar-trening ishtirokchilarda katta taassurot uygʻotdi.

Tadbir yakunida ishtirokchilar oʻzlarini qiziqtirgan savollariga maʼruzachilardan tegishlicha javoblar olishdi.

Shuhrat Hayitov,

Oʻzbekiston “Adolat” SDP Termiz tuman Kengashi raisi,

Xalq deputatlari Termiz tuman Kengashi deputati