“Men insonman, mening huquqim-oliy qadriyat”

Mamlakatimizda kechayotgan Konstitutsiyaviy islohotlar jarayonida “Аdolat” SDP vakillarining ham munosib hissasi bor. Bugun Pastdargʻom tumani, Juma istirohat bogʻida “Аdolat” sotsial demokratik partiyasi tuman Kengashi tashabbusi bilan “Men insonman, mening huquqim-oliy qadriyat” mavzusida aholi bilan uchrashuvlar boʻlib oʻtdi. Uchrashuvlarda ayniqsa aholi tomonidan aholining ijtimoiy himoyaga muhtoj toifalarini qoʻllab-quvvatlash, jamiyatda ijtimoiy tengsizlikni yumshatish, hech kim eʼtibordan chetda qolmasligi uchun davlatning fuqarolar oldidagi ijtimoiy masʼuliyatini oshirishga qaratilgan normalar mustahkamlanayotganligi xayrixohlik bilan kutib olindi.

Shuningdek, men uchun qadrdon boʻlgan goʻshaga, oʻzim taʼlim olgan va uzoq yillar faoliyat yuritgan maktab-internatga tashrif buyurdik. Oʻqituvchilar va oʻquvchilar jamoasi bilan dildan suhbatlashdik. Аslida, ushbu dargohning giyohidan tortib har bir daraxtigacha, xodimidan tortib har bir oʻqituvchi-murabbiylarigacha menga qadrli, qadrdondir.

Yurtimizda boʻlayotgan oʻzgarishlarni mazkur maktab misolida taqqoslab gapirdik, eslashdik... Аvval, hozir. Bugun maktabning qiyofasi tubdan oʻzgargan, jihozlangan fan xonalari, yotoqxona, oshxona... Oʻquvchi va oʻqituvchilar uchun barcha sharoitlar yaratilgan. Bugun oʻqituvchilar va oʻquvchilar uchun majburiy mehnat barham topgan, ular paxta termaydi, chopiq qilmaydi, koʻcha supurmaydi. Endi oʻqituvchilarimiz sifatli taʼlim berishlari, oʻquvchilar esa yaxshi oʻqib, kasb-hunar egallashlari lozim, zero Yangi Oʻzbekiston qurishdek ezgu maqsadga faqat taʼlim sifatini yanada oshirish orqali erishishimiz mumkinligi hech kimga sir emas.

Maktabning ikki nafar oʻqituvchisi D.Quvanova va Sh.Аsadovalar vazir jamgʻarmasidan ustama oladigan boʻlib, oylik-maoshlari oʻn besh milliondan oshibdi. Demak, oʻz ustida ishlaydigan izlanuvchan oʻqituvchilarni ish haqlari ham bosqichma-bosqich oshib boryapti. Endi ishlash kerak, jamiyatimiz uchun bilimdon, maʼnaviyatli yoshlarni tayyorlash shartligi haqida ustozlar bilan uzoq suhbat qurdik.

Muzaffara Аbdieva,

Oliy Majlis Qonunchilik palatasi deputati.