Mening Konstitutsiyam – mening kelajagim!

Xabaringiz bor, shu kunlarda Respublikamizning barcha hududlarida 30-aprel kuni boʻlib oʻtadigan umumxalq referendumiga oid targʻibot tadbirlari boʻlib oʻtmoqda.

Bugun Oʻzbekiston “Adolat” SDP Toshkent viloyati Kengashi tashabbusi bilan Chirchiq shahridagi Oʻzbekiston davlat jismoniy tarbiya universiteti bilan hamkorlikda mazkur oliygohning katta yigʻinlar zalida “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi va shu munosabati bilan boʻlib oʻtishi kutilayotgan referendumga munosib tayyorgarlik koʻrish, aholi oʻrtasida yanada samarali targʻibot-tashviqot ishlarini amalga oshirish, partiyaning jarayonda faol ishtirok etishini taʼminlash maqsadida tadbir oʻtkazildi.

Tadbirda Oʻzbekiston “Adolat” SDP Toshkent viloyati Kengashi raisi Farmon Allayev, universitet rektori Mahmudjon Boltaboyev, Xalq deputatlari Toshkent viloyati hamda mahalliy Kengashlaridagi partiya deputatlari, partiyaning mahalliy Kengashlari raislari hamda Milliy gvardiyaning Chirchiq shahrida joylashgan harbiy qismi xizmatchilari shuningdek, yoshlar va OAVlar vakillari ishtirok etishdi.

Davra suhbatida soʻz olgan “Adolat” SDP Toshkent viloyati Kengashi raisi Farmon Allayev “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasini qoʻllab-quvvatlarkan, bu boradagi oʻz fikr-mulohazalari bilan oʻrtoqlashdi.

Taʼkidlanganidek, yangilanayotgan Konstitutsiyamizda birgina yoshlarning huquq va erkinliklarining kafolatlanishi borasidagi normalar soni ikki baravarga oshmoqda. Xususan, unda kiritilayotgan konseptual oʻzgarishlar qatorida jamiyatning yarmidan koʻpini tashkil qiladigan yoshlarga munosib hayot sharoiti yaratish, barqaror iqtisodiyot, xavfsiz davlat, samarali boshqaruv, ijtimoiy kafolatlar yanada mustahkamlanmoqda.

Bundan tashqari, yoshlarning taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiyaviy majburiyati sifatida kiritilayotganligi, mazkur normalar, nafaqat yoshlar manfaati, balki butun jamiyatimiz va mamlakatimizning kelgusi taqdiri uchun muhim.

Tadbirda shuningdek, universitet rektori, xalq deputatlari Toshkent viloyati hamda mahalliy Kengash deputatlari soʻzga chiqishib, Konstitutsiyaga kiritilayotgan oʻzgarishlar xususida oʻz fikr va munosabatlarini bildirishdi.

Qizgʻin savol-javoblarga boy tarzda oʻtgan davra suhbati davomida maʼruzalar yuzasidan ishtirokchilar tomonidan xilma-xil fikrlar oʻrtaga tashlandi.

Ravshan Mirzaqulov,
Oʻzbekiston “Adolat” SDP
Toshkent viloyati Kengashi
matbuot kotibi