Muddatidan oldin ovoz berish

Joriy yilning 30-aprelʼ kuni “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi boʻyicha referendum oʻtkaziladi. Yangi Oʻzbekistonning kelajagi va qonunchiligimizga kiritilayotgan oʻzgartishlarga befarq boʻlmagan har bir saylovchi siyosiy voqelikda ishtirok etish bilan oʻz burchini bajaradi. Savol tugʻiladi: referendum kuni oʻz turar joyida boʻlish imkoniyatiga ega boʻlmagan fuqarolar muddatidan oldin ovoz berishi mumkinmi?

“Adolat” SDP Andijon viloyat kengashi tashabbusi bilan Andijon tumanidagi 55-maktabda tashkil etilgan davra suhbatida ayni shu savol koʻtarildi. Saylovchilarga bu borada Oliy Majlis Qonunchilik palatasi deputati Mavluda Adhamjonova atroflicha tushuncha berdi.

Jumladan u shunday dedi:

-Referendumga tayyorgarlik tadbirlarida fuqarolarning huquqiy madaniyati anchayin oʻsgani oʻz ifodasini topdi. Koʻtarilgan masala ham oʻrinli. Oʻzbekiston Respublikasi Markaziy saylov komissiyasining majlisida maʼlum qilinganidek, referendumda muddatidan oldin ovoz berish mumkin. Bu jarayon 19-26-aprel kunlari boʻlib oʻtadi. Demak saylovchilar muddatidan avval ham oʻz munosabatlarini bildirishi mumkin.

Saddatagi va Guliston mahallasida yashovchilar tadbir davomida Konstitutsiyamizga kiritilayotgan oʻzgartishlar xususida ham oʻzlarini qiziqtirgan savollariga javob topdilar.

“Adolat” SDP Andijon viloyat kengashi
Matbuot xizmati.