Muhokama aniq maqsadli takliflar berish imkoniyati

Muhtaram Prezidentimiz tashabbuslari bilan 2023 yilning “Insonga eʼtibor va sifatli taʼlim yili” deb eʼlon qilinganligi xalqimiz tomonidan iliq kutib olindi. Xalqimizning ushbu yildan katta maqsadlarni va marralarni ko'zlayotgani ham fikrimizning yaqqol misolidir.

Shularni inobatga olgan holda, anʼanaga koʻra joriy yilning 6 fevralidan 17 fevraliga qadar Oʻzbekiston Respublikasi Prezidentining “2022–2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida”gi farmoni loyihasi keng jamoatchilik muhokamasidan oʻtkazilishi belgilandi.

Albatta, davlat dasturi loyihasida aholining ishtirok etib, ular tomonidan bildirilgan taklif va fikrlarning inobatga olinishi, davlat organlarining xalqimiz oldidagi shaffofligini va hisobdorligini taʼminlaydi.

Shuni alohida taʼkidlash joizki, Davlatimiz rahbari tashabbusi bilan amalga oshirilayotgan keng koʻlamli islohotlar natijasida bugun davlat bilan xalq oʻrtasidagi muloqotlar yangi bosqichga koʻtarilib, xalqimizning xohish-istaklarini mustaqil ifoda etishlari uchun barcha zarur shart-sharoitlar yaratilgan.

Bugungi muhokamalar markazida boʻlgan “Insonga eʼtibor va sifatli taʼlim yili”da amalga oshiriladigan ishlar koʻlamini belgilovchi davlat dasturi loyihasi 7 ta yoʻnalish va 309 ta banddan iborat boʻlib, oʻylaymanki, mazkur jarayonlarda ishtirok etgan har bir fuqaroning fikrlari va oʻz muammolari boʻyicha bildirgan takliflari dasturning yanada xalqchilligini oshirishga xizmat qiladi.

Eng asosiysi dastur loyihasida partiyamiz saylovoldi dasturida belgilangan maqsadlarimizga hamohang boʻlgan bir qancha maqsad va vazifalar belgilab berildi. Xususan, aholiga birlamchi tibbiy xizmatlarni yaqinlashtirish maqsadida 30 ta oilaviy poliklinika, 110 ta oilaviy shifokorlik punkti hamda 520 tagacha ixcham mahalla tibbiyot punktlarini tashkil etish nazarda tutilmoqda. Bu o'z navbatida xalqimiz salomatligini asrash va yaxshilashga, shuningdek, elektoratimiz manfaatlariga xizmat qiladi.

Qolaversa, qator vaqtincha mehnatga layoqatsizlik varaqalari va boshqa tibbiy maʼlumotnomalar berilishini bosqichma-bosqich elektron shaklga oʻtkazish, elektr, gaz va suv sarfi hisoblagichlarini qiyoslashdan oʻtkazish boʻyicha davlat xizmatlarini proaktiv tarzda (davlat tashkilotining oʻz tashabbusi bilan fuqaro murojaatini kutmasdan) koʻrsatishni yoʻlga qoʻyish kabi maqsadlarning belgilanishi aholiga keng qulayliklar yaratishi bilan ahamiyatlidir.

Mamlakatimiz taraqqiyoti va xalqimiz turmush farovonligini taʼminlashda oʻta muhim hujjat hisoblangan Davlat dasturi loyihasi muhokamasida partiyaning Qoraqalpogʻiston Respublikasi Kengashidagi faollari va barcha darajadagi deputatlik korpusimiz vakillari, elektoratimiz vakillari va saylovchilarimiz oʻz takliflari bilan faol ishtirok etmoqda.

Nurlibay Qaipbergenov,
Oʻzbekiston “Adolat” SDP
Qoraqalpogʻiston Respublikasi
Kengashi raisi