Murojaat deputat nazoratida

Toshkent shahar Sergeli tumani “Kengmakon” MFYda istiqomat qiluvchi 26 yoshli Dilnoza Nuriddinova goʻdaklik vaqtida notoʻgʻri emlanganligi sabab ikki oyogʻi shol boʻlib qolgan. Shunday boʻlishiga qaramasdan u inson har qanday holatida ham kuchli irodasi bilan nimalarga qodir ekanligini isbotlagan qahramon qiz. Ayrim soppa-sogʻ insonlarga uning qilayotgan ishlarini ibrat namunasi qilib keltirish mumkin. Tadbirkorlik faoliyatini yuritayotgan Dilnoza Nuriddinovaning bugungi kunda oʻzi yashayotgan mahallada yengil avtomobillarga xizmat koʻrsatuvchi moy almashtirish shoxobchasi mavjud.

Bu ishini u shunday izohlaydi:

- Yoshligimdan akamlar bilan oʻsganim uchun avtomobillarga qiziqishim yuqori. Ulardan koʻp narsani oʻrganganman. Shu sabab tadbirkorlik qiziqishimni shu ishga bogʻlaganman.

Imkoniyati cheklangan qahramonimiz juda koʻp joylarga murojaat qildi. Ammo yozgan murojaatlari rad etilib kelinaverdi. Qizga Hindiston davlatiga borib operatsiya qilinishi uchun 23 ming AQSH dollar mablagʻ zarur. Faqatgina Toshkent shahar hokimi J.Ortiqxoʻjayev qizning nolalariga quloq tutdi. U bilan yuzma-yuz uchrashuvda oʻzi harakatlanadigan skuterni xayriya sifatida taqdim etdi. Bu D.Nuriddinovaning birovlar yordamisiz erkin harakatlanishiga oz boʻlsa-da yordam berdi. Qiz operatsiya mablagʻi uchun Oliy Majlis Qonunchilik palatasi deputati Gulruh Agzamovaga ham murojaat qildi.

Deputat uning murojaatlarini diqqat bilan tinglab, uni shahar kengashi deputatlarining sessiyasida masala sifatida koʻrib chiqilishi uchun taqdim etdi. D.Nuriddinovaning muammosi faqatgina bu emas. U istiqomat qilayotgan uy “snos”ga tushgan. Bu uyda undan tashqari ikki akasi va kelinoyilari farzandlari bilan yashaydi. Maʼlum qilinishicha, bu uy va qolgan qoʻshnilar uyi oʻrnida yangi asfalt yoʻl yotqizilishi rejalashtirilgan. Agar “snos” boʻyicha buziladigan boʻlsa D.Nuriddnova yashaydigan 8 sotixli uyning 2 sotix qismiga zarar yetadi. Bu esa shundoq ham ijtimoiy himoyaga muhtoj oilaning ahvolini battar ogʻirlashtiradi. Uy buzilishi boʻyicha tuman kadastr agentligidan bir necha marta ogohlantirish xati kelgan. Bunga javoban D.Nuriddinovaning bormagan joyi qolmadi. Biroq hanuzgacha rad javobi olib kelmoqda.

Bugun deputat G.Agzamova qizning barcha murojaatlarini sinchiklab oʻrganib, unga yechim topish boʻyicha harakatda.

Mehriniso YAKUBOVA,
“Adolat” SDP Toshkent shahar kengashi 
Matbuot kotibi