Murojaatnoma sherobodlik xotin-qizlar nigohida

Oʻzbekiston “Adolat” SDP Sherobod tuman Kengashi va partiya tuman “Ayollar qanoti” Kengashi tomonidan tumandagi Axborot kutubxona markazida Prezidentimiz Shavkat Mirziyoyevning 2022-yil 20-dekabrdagi Oliy Majlis va Oʻzbekiston xalqiga Murojaatnomasining oltita ustuvor yoʻnalishlaridagi vazifalarni amalga oshirish hamda Murojaatnoma targʻiboti boʻyicha davra suhbati tashkil etildi. 

Tadbirda partiya tuman Kengashi va “Ayollar qanoti” Kengashi faollari, deputatlar, hududdagi ayol-qizlar, BPT faollari va kutubxona xodimlari ishtirok etishdi.

Tadbirda soʻzga chiqqanlar Murojaatnomada dastlab 2022-yil gʻoyat murakkab va sinovli yil boʻlishiga qaramasdan erishilgan natija va koʻrsatkichlarga eʼtibor qaratilib, shuningdek, 2023-yilda ham Oʻzbekistonda olib borilayotgan davlat siyosatining markazida inson va uning manfaatlarini taʼminlash ustuvor vazifa etib belgilanganiga alohida toʻxtalib oʻtishdi.

Shuningdek, soʻzga chiqqanlar “Insonga eʼtibor va sifatli taʼlim yili”da insonni sharaflash, uning qadri, shaʼnini oliy qadriyat bilish, orzu-niyatlarini amalga oshirish yoʻlida taʼlimning ahamiyati beqiyosligini taʼkidladilar.

Qarshi Allanazarov, Partiya Sherobod tuman Kengashi faoli:

- Belgilangan vazifalarning izchilligini taʼminlash maqsadida 2023-yilga “Insonga eʼtibor va sifatli taʼlim yili”, deb nom berildi. Shu bilan birgalikda, yil davomida amalga oshirishga qaratilgan oltita ustuvor yoʻnalish va vazifalarning belgilanganligi ham nihoyatda ahamiyatlidir. Murojaatnomada taʼlimni yangi bosqichga olib chiqish masalasiga eʼtibor qaratib, kelgusida amalga oshirilishi nazarda tutilgan aniq vazifalar belgilab berildi. Oʻylaymanki, kelajak yoʻlida qaygʻurish bizga suv va havodek zarur. Bu masalaga befarq qarab, keyinga qoldirib boʻlmaydi. Davlatimiz rahbari buni toʻla anglab, eʼtibor qaratgani koʻngildagi gap boʻldi. Yurtboshimiz oʻz chiqishida koʻplab xalqchil taklif va tashabbuslarni olgʻa surdi. Ertangi kunda ularning roʻyobga chiqishi, albatta, Yangi Oʻzbekistonning gullab-yashnashiga xizmat qiladi, odamlarni hayotdan rozi qilishga zamin yaratadi.

Tadbir yakunida ishtirokchilarning Murojaatnoma yuzasidan bildirgan fikr-mulohazalari tinglanib, maʼruzachilar tomonidan ularni qiziqtirgan barcha savollarga javob berildi.

Manzura Ulugʻberdiyeva,
Oʻzbekiston “Adolat” SDP Sherobod tuman
“Ayollar qanoti” Kengashi faoli