Mustaqillik – haq huquq demakdir

 Prezidentmizning joriy yil 27 iyulda qabul qilingan "O‘zbekiston Respublikasi davlat mustaqilligining o‘ttiz ikki yillik bayramiga tayyorgarlik ko‘rish va uni o‘tkazish to‘g‘risida"gi qarorida: “Mustaqil taraqqiyot yo‘lidagi keng ko‘lamli islohotlarimizni izchil davom ettirish, barcha soha va tarmoqlar rivojini yangi bosqichga olib chiqish maqsadida bugungi kunda yurtimizda millati, tili va dinidan qat’i nazar, har bir fuqaro erkin va farovon yashaydigan yangi jamiyat va davlat barpo etilmoqda” deyilgan.

 Darhaqiqat,  Prezidentimizning mus­taqillik bayramini ko‘tarinki ruhda nishonlashga bag‘ishlangan mazkur qarori yurtimizda umrguzaronlik qilayotgan har bir fuqaroning qalbidan joy oldi.   Chunki  istiqlol buyuk ne’mat,  qolaversa,  biz barpo etayotgan Yangi O‘zbekis­tonning o‘q ildizi. Milliy suverenitet – biz poydevorini tiklayotgan Uchinchi Renessansning mus­tahkam tayanchidir.

Yurtimizda mustaqillik yillarida  majburiy meh­nat va bolalar mehnatiga barham berish, ayniqsa, ta’lim tizimi xodimlarini o‘z xizmat vazifalari bilan bog‘liq bo‘lmagan ishlarga jalb etish hollariga qarshi kurashish samaradorligini oshirishga qaratilgan qonun hujjatlarini hamda ularni amalga oshirish mexanizmlarini takomillashtirishga alohida e’tibor qaratildi. Jinoyat va Ma’muriy javobgarlik to‘g‘risidagi kodekslarga  pedagog xodimlarni majburiy mehnatga jalb qilish bilan bog‘liq huquqbuzarliklar, ularning kasbiy faoliyatiga aralashganlik uchun javobgarlik belgilandi.Men pedagog bo‘lganligim uchun ham bu  biz uchun yaratilgan qulayliklarni juda qadrlayman. Bundan tashqari, istiqlol yillarida xotin-qizlar manfaatlarini qonuniy himoya qilish, ularni turli tazyiq va zo‘ravonliklardan mustahkam himoya qilish davlat siyosati darajasiga ko‘tarilganidan juda ham xursandman. Ayniqsa, 

2023 yil 11 aprelda «Xotin-qizlar va bolalar huquqlari, erkinliklari ham­da qonuniy manfaatlarini ishonchli himoya qilish tizimi yanada takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida»gi qonun qabul qilingani ayni muddao bo‘ldi.

Mazkur qonun asosida xo­tin-qizlar va bolalar huquqlari, erkinliklari hamda qonuniy manfaatlarini  har tomonlama  ishonchli himoya qilishning institutsional hamda huquqiy asoslari tubdan takomillashtirildi.

Bundan buyon jinsiy zo‘ravonlik, shu jumladan, voyaga yetmaganlarga nisbatan jinsiy zo‘ravonlik sodir etgan shaxslarga nisbatan jazoni muddatidan ilgari shartli ozod qilish yoki jazoni yengilrog‘i bilan almashtirish mumkin emas.

        Davlat hisobidan yuridik yordam kam ta’minlanganlar, teng huquqliligi buzilgan xotin-qizlar va erkak­lar hamda psixiatriya yordami ko‘rsatilayotgan shaxslarga ko‘rsatilishi belgilandi.

Bularning barchasi, bir tomondan,  serquyosh O‘zbekistonda inson huquqlari, erkinliklari va qonuniy manfaatlarini ta’minlash borasida amalga oshirilayotgan keg qamrovli  izchil siyosatning mazmun-mohiyatini mamlakatimiz hamda jahon jamoatchiligiga chu­qur tushuntirishga xizmat qilsa, ikkinchi tomondan, Istiqlol bayramimizning “Har bir kun – bu imkoniyat, har bir kun – bu kelajak uchun poydevor” degan hayotiy shiori ahamiyatini aynan inson huquqlari talqini timsolida teran ochib berishda ham muhim o‘rin tutishini alohida e’tirof etmoq joiz.

Umuman olganda,  davlatimiz rahbari alohida  ta’kidlaganlaridek, “bugun biz intilayotgan Yangi O‘zbekistonni barpo etish, Uchinchi Renessans poydevorini yaratish oson emas. Bunday ulug‘ vazifaning sharti va mezonlari ko‘p. Ammo eng muhim va hal qiluvchi omil – bu demokratik islohotlar yo‘lidir. Shu bois xalqimiz manfaatiga to‘la javob beradigan bu yo‘ldan hech qachon ortga qaytmaymiz”.

Xalqimiz ham xuddi shu Prezidentimiz takliflarini yuz foiz ma’qullamoqda. Negaki, mustaqillik elimizning necha ming yillik ulug‘ orzusi edi. Bunga erishdik. Endi har birimiz uni yanada mustahkamlash, dunyoda Yangi O‘zbekistonni rivojlangan mamlakatlar qatoriga olib chiqish uchun o‘z fidoiyligimiz bilan matonat ko‘rsatib ishlashimiz kerak.

Istiqlol har birimizga muborak bo‘lsin aziz vatandoshlar. Barcha xonadonlarimizda  farovonlik, yurtimizga esa tinchlik abadiy bo‘lsin. Yana bir bor  mustaqillik bayrami bilan tabriklayman, qadrli yurtdoshlar.

                                              Maqsuda Mustafoyeva,

                                       Xalq deputatlari Qashqadaryo viloyat Kengashidagi

                                      O‘zbekiston “Adolat” SDP deputatlik  guruhi

                                      a’zosi, Qarshi shahridagi  11-umumiy o‘rta ta’lim

                                      maktabi direktori.