Mustaqillik – haq huquq demakdir

Prezidentmizning   joriy yil 27-iyulda qabul qilingan “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni oʻtkazish toʻgʻrisida”gi qarorida: “Mustaqil taraqqiyot yoʻlidagi keng koʻlamli islohotlarimizni izchil davom ettirish, barcha soha va tarmoqlar rivojini yangi bosqichga olib chiqish maqsadida bugungi kunda yurtimizda millati, tili va dinidan qatʼi nazar, har bir fuqaro erkin va farovon yashaydigan yangi jamiyat va davlat barpo etilmoqda” deyilgan.

Darhaqiqat, Prezidentimizning mus­taqillik bayramini koʻtarinki ruhda nishonlashga bagʻishlangan mazkur qarori yurtimizda umrguzaronlik qilayotgan har bir fuqaroning qalbidan joy oldi. Chunki istiqlol buyuk neʼmat, qolaversa, biz barpo etayotgan Yangi Oʻzbekis­tonning oʻq ildizi. Milliy suverenitet – biz poydevorini tiklayotgan Uchinchi Renessansning mus­taxkam tayanchidir.

Yurtimizda mustaqillik yillarida majburiy meh­nat va bolalar mehnatiga barham berish, ayniqsa, taʼlim tizimi xodimlarini oʻz xizmat vazifalari bilan bogʻliq boʻlmagan ishlarga jalb etish hollariga qarshi kurashish samaradorligini oshirishga qaratilgan qonun hujjatlarini hamda ularni amalga oshirish mexanizmlarini takomillashtirishga alohida eʼtibor qaratildi. Jinoyat va Maʼmuriy javobgarlik toʻgʻrisidagi kodekslarga pedagog xodimlarni majburiy mehnatga jalb qilish bilan bogʻliq huquqbuzarliklar, ularning kasbiy faoliyatiga aralashganlik uchun javobgarlik belgilandi. Men pedagog boʻlganligim uchun ham bu biz uchun yaratilgan qulayliklarni juda qadrlayman. Bundan tashqari, istiqlol yillarida xotin-qizlar manfaatlarini qonuniy himoya qilish, ularni turli tazyiq va zoʻravonliklardan mustahkam himoya qilish davlat siyosati darajasiga koʻtarilganidan juda ham xursandman. Ayniqsa, 2023-yil 11-aprelda “Xotin-qizlar va bolalar huquqlari, erkinliklari ham­da qonuniy manfaatlarini ishonchli himoya qilish tizimi yanada takomillashtirilishi munosabati bilan ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun qabul qilingani ayni muddao boʻldi.

Mazkur qonun asosida xo­tin-qizlar va bolalar huquqlari, erkinliklari hamda qonuniy manfaatlarini har tomonlama ishonchli himoya qilishning institutsional hamda huquqiy asoslari tubdan takomillashtirildi.

Bundan buyon jinsiy zoʻravonlik, shu jumladan, voyaga yetmaganlarga nisbatan jinsiy zoʻravonlik sodir etgan shaxslarga nisbatan jazoni muddatidan ilgari shartli ozod qilish yoki jazoni yengilrogʻi bilan almashtirish mumkin emas.

Davlat hisobidan yuridik yordam kam taʼminlanganlar, teng huquqliligi buzilgan xotin-qizlar va erkak­lar hamda psixiatriya yordami koʻrsatilayotgan shaxslarga koʻrsatilishi belgilandi.

Bularning barchasi, bir tomondan, serquyosh Oʻzbekistonda inson huquqlari, erkinliklari va qonuniy manfaatlarini taʼminlash borasida amalga oshirilayotgan keng qamrovli izchil siyosatning mazmun-mohiyatini mamlakatimiz hamda jahon jamoatchiligiga chu­qur tushuntirishga xizmat qilsa, ikkinchi tomondan, Istiqlol bayramimizning “Har bir kun – bu imkoniyat, har bir kun – bu kelajak uchun poydevor” degan hayotiy shiori ahamiyatini aynan inson huquqlari talqini timsolida teran ochib berishda ham muhim oʻrin tutishini alohida eʼtirof etmoq joiz.

Umuman olganda, davlatimiz rahbari alohida taʼkidlaganlaridek, “bugun biz intilayotgan Yangi Oʻzbekistonni barpo etish, Uchinchi Renessans poydevorini yaratish oson emas. Bunday ulugʻ vazifaning sharti va mezonlari koʻp. Ammo eng muhim va hal qiluvchi omil – bu demokratik islohotlar yoʻlidir. Shu bois xalqimiz manfaatiga toʻla javob beradigan bu yoʻldan hech qachon ortga qaytmaymiz”.

Xalqimiz ham xuddi shu Prezidentimiz takliflarini yuz foiz maʼqullamoqda. Negaki, mustaqillik elimizning necha ming yillik ulugʻ orzusi edi. Bunga erishdik. Endi har birimiz uni yanada mustahkamlash, dunyoda Yangi Oʻzbekistonni rivojlangan mamlakatlar qatoriga olib chiqish uchun oʻz fidoiyligimiz bilan matonat koʻrsatib ishlashimiz kerak.

Istiqlol har birimizga muborak boʻlsin aziz vatandoshlar. Barcha xonadonlarimizda farovonlik, yurtimizga esa tinchlik abadiy boʻlsin. Yana bir bor mustaqillik bayrami bilan tabriklayman, qadrli yurtdoshlar.

                                            Maqsuda Mustafoyeva,

    Xalq deputatlari Qashqadaryo viloyat Kengashidagi

      “Adolat” SDP deputatlik guruhi  aʼzosi,

Qarshi shahridagi 11-umumiy oʻrta taʼlim maktabi direktori.