NAMANGANDA XALQARO GULLAR FESTIVALI

Oʻtgan yakshanba kuni Namanganda mamlakatimiz madaniy hayotida muhim oʻringa ega boʻlgan Xalqaro gullar festivali boshlandi. Mazkur tadbir 62-marta oʻtkazilayotgani diqqatga sazovordir. Goʻzallik va nafosat bayrami yurtimizning sayyohlik salohiyatini oshirishda alohida eʼtirofga loyiqligi barchaga maʼlum.

— Har yilgiday festivalga tayyorgarlik koʻrishga munosib hissa qoʻshdik, — deydi “Adolat” SDP viloyat Kengashi raisi Isroiljon Joʻrayev. — Chunki bayram dasturiga partiyadoshlarimiz ishtirokidagi tadbirlar ham kiritilgan. Xususan, yangilangan Konstitutsiyaning mazmun-mohiyatiga, “Adolat” SDPning gʻoya va maqsadlariga, shu kunlarda davom etayotgan muddatidan ilgari Prezident saylovoldi kampaniyasiga doir suhbat va uchrashuvlar oʻtkazishni rejalashtirganmiz.

Tantanali goʻzallik ayyomi har yilgidek Namangan xalqaro aeroportidan yoʻlga chiqqan gullar karvoni bilan boshlandi. 200 dan ortiq turli xil rusumdagi avtomobillar gullarga burkangan holda harakatlandi.

Gul ishqibozlari tomonidan yaratilgan betakror kompozitsiyalar festivalning oʻziga xos tashrif qogʻozlaridan biriga aylangan.

Eslatib oʻtamiz, festival 21-iyunga qadar Zahiriddin Muhammad Bobur nomidagi madaniyat va istirohat bogʻi, “Adiblar xiyoboni”, “Afsonalar vodiysi” tematik parki va boshqa dam olish maskanlarida davom etadi.

Mana bu esa viloyat hokimi, Oliy Majlis Senati aʼzosi Shavkat Abdurazzoqovning fikrlari:

— Bayramni oʻtkazishda tashkiliy jihatdan tub burilishga hissa qoʻshganimdan xursandman. Bayramni gul ekish va qarovi uchun noqulay boʻlgan avgust oyidan mayga koʻchirdik. Gullar bilan bezatilgan avtomashinalar karvonini tikladik. Festival tarixiga bagʻishlangan muzey ochdik, eski suratlar asosida xotira-voqealarni gavdalantirdik. Olis oʻlkalardan keltirilgan yangi navdagi gullarni iqlimimizga moslashtirish, klonlashtirish niyatida Gulchilar assotsiatsiyasini tuzdik. Namangan shahriga hokim boʻlgan davrimda Turkiyaga xizmat safari bilan borib, Istanbul shahrining obodonlashtirish va gulchilikda landshaft dizayni tajribasini oʻrganib qaytgandim. Bugun esa viloyat hokimi sifatida gulchilikni har tomonlama qoʻllab-quvvatlash saʼy-harakatidan charchamayman.

Aziz hamyurtlar va shahrimiz mehmonlari! Tabiat iforidan, goʻzallikdan bahramand boʻlay desangiz, gullar diyori Namanganga keling!

Nurbek ABDULLAYEV,
“Adolat” SDP Namangan viloyat
Kengashi matbuot kotibi.