Navroʻz tantanalarida andijoncha palov

Andijonda oʻtkazilayotgan Navroʻz bayrami tadbirlari chinakam xalq sayliga aylanmoqda. “Adolat” SDP Andijon viloyat kengashi va Andijon davlat tibbiyot instituti hamkorligida yoshlar uchun tashkil etilgan bayram tadbiri ham katta shodiyonaga aylandi. Unda talaba-yoshlar bilan birga ularning ota-onalari va jamoatchilik vakillari ishtirok etdi.

Bayramona bezatilgan sahnada badiiy havaskorlik jamoalari va isteʼdodli anʼanaviy ijrochilar tomonidan milliy kuy-qoʻshiqlar, raqs va tomoshalar namoyish etilib, tadbir qatnashchilariga bayram kayfiyati ulashildi. Talabalarning sahnadagi mahorati olqishlar bilan baholandi.

Sport ixlosmandlari tomonidan koʻrgazmali chiqishlar oʻzida sport goʻzalligini ifodaladi. Kitob koʻrgazmalaridan badiiy va ilmiy-ommabop adabiyotlar oʻrin oldi. Milliy urf-odatlarimiz aks etgan oʻyinlar, milliy taomlar koʻrgazmalari tashkillashtirildi. “Yosh adolatchilar” tomonidan tayyorlangan palov hakamlar safidan oʻrin olgan “Adolat” SDP Siyosiy kengashi raisi oʻrinbosari Abdukamol Rahmonov va partiyaning Andijon viloyat kengashi raisi Madaminjon Madazimov tomonidan yuqori baholandi.

“Adolat” SDP Andijon viloyat kengashi
Matbuot xizmati.