Oʻzbek tili bayrami yuqori saviyada nishonlanmoqda

Til har bir millatning eng qadrli boyligi, uning maʼnaviy qiyofasi, bebaho mulki, madaniyati, ichki dunyosini aks ettiruvchi muhim vosita sanaladi desak xato boʻlmaydi. Aynan til odamlar guruhini bir millat sifatida biriktiradi, yaʼni xalqni – xalq, millatni – millat qiladi. 1989 yil 21 oktyabr “Davlat tili haqida”gi qonun qabul qilinib, oʻzbek tiliga davlat tili maqomi berildi. Xalqimizning muqaddas qadriyatlaridan biri boʻlgan ona tilimiz oʻzining qonuniy maqomi va himoyasiga ega boʻldi.

Shu munosabat bilan yurtimizda har yili “21 oktyabr – Oʻzbek tili bayrami kuni” sifatida keng nishonlanib kelinadi. Shunday tadbirlardan biri, “Adolat” SDP Forish tuman Kengashi tomonidan 55-umumtaʼlim maktabida “Qadring baland boʻlsin, ona tilim” mavzusida maʼnaviy-maʼrifiy tadbir boʻlib oʻtdi. Tadbirda partiyaning tuman Kengashi, “Ayollar qanoti” va “Yoshlar qanoti” faollari, tuman maʼnaviyat va maʼrifat markazi, maktab oʻqituvchilari va oʻquvchilari ishtirok etishdi.

Tadbirda soʻzga chiqqanlar tomonidan oʻzbek tilining huquqiy maqomini belgilashda yengib oʻtilgan qiyinchiliklardan tortib hozirgi kunda tilimizning boy imkoniyatlaridan keng foydalanish uchun yaratilgan shart – sharoitlar, til-davlat timsoli, mulki, ruhi, millatning madaniy va maʼnaviy boyligi ekanligi, tilimizni eʼzozlash, uning davlat tili sifatidagi maqomi, jamiyatdagi mavqeyini yuksaltirish, yosh avlodni ona tiliga hurmat ruhida tarbiyalash, oʻzbek tilining xalqaro miqyosdagi obroʻ-eʼtiborini yuksaltirish uchun uni milliy va umumbashariy tushunchalar asosida taraqqiy etgan tillar safiga kiritishda oʻz hissamizni qoʻshishimiz zarurligi alohida eʼtirof etildi.

Shuningdek tadbir davomida, oʻzbek tilimizni tarannum etgan kuy va qoʻshiqlar, sheʼrlar, “ona tilim-jonu dilim” shiori ostida oʻtkazilgan chellendjlar ishtirokchilarga yanada koʻtarinkilik bagʻishladi.

Fikr-mulohazalar va takliflarga boy boʻlgan tadbir soʻngida ishtirokchilarning qiziqtirgan savollari mutaxassislar tomonidan qanoatlantirildi va faol ishtirokchilarga partiyaning esdalik sovgʻalari taqdim etildi.

Nodir Soliev,

“Adolat” SDP Forish tuman  Kengashi raisi.