“Oʻzbekiston – 2030” strategiyasida adolat va tenglik gʻoyalari

Maʼlumki, 2023-yil 30-aprelda oʻtkazilgan referendumda umumxalq ovoz berish orqali Oʻzbekiston Respublikasining yangi tahrirdagi Konstitutsiyasi qabul qilinganligi Yangi Oʻzbekistonni barpo etishning konstitutsiyaviy asoslarini mustahkamlashga xizmat qildi.

Yangi tahrirdagi konstitutsiyaga muvofiq oʻtkazilgan prezidentlik saylovi yana bir bor jamiyatimizning siyosiy yetukligi, Yangi Oʻzbekistonni barpo etish yoʻlida amalga oshirilayotgan islohotlarni xalqimiz toʻliq qoʻllab-quvvatlayotganidan dalolat beradi.

Xalqimizning erkin va farovon, qudratli Yangi Oʻzbekistonni barpo etish boʻyicha xohish-irodasini roʻyobga chiqarish, har bir fuqaroga oʻz salohiyatini rivojlantirish uchun barcha imkoniyatlarni yaratish, sogʻlom, bilimli va maʼnaviy barkamol avlodni tarbiyalash, global ishlab chiqarishning muhim boʻgʻiniga aylangan kuchli iqtisodiyotni shakllantirish, adolat, qonun ustuvorligi, xavfsizlik va barqarorlikni kafolatli taʼminlash maqsadida, Oʻzbekiston Respublikasi Prezidentining 2023-yil 11-sentyabrdagi “Oʻzbekiston — 2030 strategiyasi toʻgʻrisida”gi PF-158-son Farmoniga muvofiq Yangi Oʻzbekistonimizda “Oʻzbekiston — 2030” strategiyasi ishlab chiqildi hamda unda koʻplab ustuvor yoʻnalishlar belgilab olindi.

Shuningdek, “Insonga eʼtibor va sifatli taʼlim yili” da oldimizga qoʻyilgan koʻplab vazifalarni bajarishda ham ushbu strategiya yoshlarga katta turtki boʻladi.

Strategiyada asosan, insonga eʼtibor, qonun ustuvorligini va ijtimoiy adolatni qoʻllab quvvatlash, xalq xizmatidagi davlat boshqaruvini tashkil etish, suv resurslarini tejash va atrof-muhitni muhofaza qilish, Barqaror iqtisodiy oʻsish orqali aholi farovonligini taʼminlash hamda “xavfsiz va tinchliksevar davlat” tamoyiliga asoslangan siyosatni izchil davom ettirish kabi dolzarb muammolar boʻyicha aniq yechimlar va takliflar keltirib oʻtilgan.

Jumladan, ular ichida men uchun eng koʻzga tashlangani qonun ustuvorligini va ijtimoiy adolatni qoʻllab-quvvatlash hamda xalq xizmatidagi davlat boshqaruvini tashkil etish boʻldi. Sababi, bugungi kundagi koʻplab ijtimoiy-huquqiy, demokratik davlatlarda yuqoridagi rejalar oʻz tasdigʻini topganini koʻrishimiz mumkin.

Soʻnggi yillarda yurtimizda demokratik islohotlar izchillik bilan amalga oshirilmoqda. Dastlab prezident tomonidan 2017-2021-yillarga moʻljallangan “Harakatlar strategiyasi”, undan soʻng “2022-2026-yillarga moʻljallangan “Taraqqiyot strategiyasi” hamda yaqinda qabul qilingan “Oʻzbekiston — 2030” strategiyasi doirasida adolat va tenglik gʻoyalariga nihoyatda katta eʼtibor qaratilgan.

“Oʻzbekiston — 2030” strategiyasi ham vatanimizning Oʻzbekiston Respublikasi Yangi Konstitutsiyasining 1-bandida keltirilganidek, ijtimoiy, huquqiy, demokratik respublika boʻlishida xizmat qiladi.

Azizbek Abdiyev,

Toshkent davlat transport universitetining 2-kurs talabasi,

Partiyaning “Yosh adolatchilar” qanoti faoli.